Dala Junta: ok ales barieres cuntra la vera sön la linia dl Prener
La Junta provinziala á dé süa aprovaziun al’inteja cun Rfi por completé i intervënc de smendrimënt dl desturb acustich sön la linia feroviara dl Prener.
Plü proteziun cuntra la vera sön la linia dl Prener: la Junta provinziala á dé süa aprovaziun en mertesc ai 25 d’otober al’inteja cun RFI (Rëi feroviara taliana, responsbla por la infrastrotöa feroviara statala) por completé i intervënc cuntra le desturb acustisch sön la linia dl Prener. Al se trata de laurs por 7,9 miliuns de euro che messará gní finanziá da RFI sön la basa de na convenziun danter RFI y Provinzia firmada tl 2007 (y ajornada tl 2010). La convenziun stabilësc ince les porzentuales de finanziamënt por la realisaziun di intervënc de ressanamënt acustich: le 80 porcënt gnará sostigní da RFI y le 20 porcënt dala Provinzia. La sozieté RFI á bele sostigní investimënc por 9,3 miliuns de euro por rové indöt a 17,3 miliuns de euro sciöche preodü dala convenziun.
Incö á la Junta provinziala aprové la prozedöra por ci che reverda l’impëgn finanziar di 7,9 miliuns de euro che resta por completé i intervënc preodüs. Le program reverda intervënc ti Comuns de Balsan, Porsenú, Prener, Pruca, Tlüses y Branzoll. Les zones olache al vëgn metü sö les barieres sará dantadöt tles vijinanzes dles staziuns dles ferate.
La Provinzia, che sön la basa dla convenziun pó fá la proietaziun y la realisaziun dles operes impede de RFI, á inciarié la sozieté inhouse dla STA. De conseguënza ti á la Junta provinziala dé l’autorisaziun al assessur por l’ambiënt Richard Theiner da firmé na Convenziun cun l’Agenzia provinziala por l’ambiënt, la STA y RFI por la realisaziun di intervënc programá.
rc
