Dala Junta: Jus dolomitics, mësa tecnica por scomenciadies deboriada
Acordanza danter les Provinzies de Balsan y Trënt y i Comuns de Sëlva y de Cianacëi por l’istituziun de na mësa tecnica sön la mobilité söi jus incër le Sela.
Definí le calënder cun i orars avisa di Green Days söl Ju dl Sela tratan l’isté 2017, garantí la regolarité y l’efiziënza cun controi di passaji, comunicaziun y colaboraziun cun i operadus dl turism y dl’economia locala y potenzié le trasport publich local y la mobilité sostenibla: chisc é n valgügn punc dla mësa interprovinziala söi Jus dles Dolomites che gnará istituzionalisada tosc cun la sotescriziun de n’acordanza programatica. Incö mertesc ai 25 de otober á la Junta provinziala aprové i contignüs dl’acordanza, autorisan i assessurs competënc Florian Mussner y Richard Theiner da la firmé adöm al assessur trentin Mauro Gilmozzi, al ombolt de Sëlva Roland Demetz y de Cianacëi Silvano Parmesani sciöche ince i suranstanc di Comun General de Fascia, dl’Assoziaziun turistica fasciana y dles assoziaziuns turistiches de Gherdëna y Alta Badia.
Le grup de laur é bele operatif da söporjö n ann adöm cun i grups d’interes dal turism, dal monn economich y istituzional y á bele efetué n’analisa sön i passaji di auti sön i jus dl Sela. La pröma scomenciadia importanta dl proscim ann sará i Green Days, chël ó dí la stlüta dl passaje por i auti dl Ju dl Sela por n de spezifich tratan l’edema por döt l’isté por ti lascé plü lerch ai peduns y a chi dla roda. Implü dess le grup de laur ince analisé de plü mosöres por ci che reverda la mobilité sostenibla, sciöche por ejëmpl l’ampliamënt dl trasport publich, l’adoranza di mesi y rodes eletriches y sistems permanënc de monitorjae dl trafich. Na pröma basa é ince n’analisa de dac ampla che é gnüda fata dal’Eurac sön inciaria dla Fondaziun Dolomites Unesco y che á mosoré dai 05 ai 31 d’agost indöt 25.000 mesi sön i jus incër le Sela.
„I Green Days sará la pröma mosöra spezifica por revalorisé i jus y da integré tres deplü la mobilité te n raiun sensibel sciöche les Dolomites“, á splighé l’assessur por l’ambiënt Richard Theiner. „I orun ince aumenté l’oferta di mesi de trasport publich cun ince n anuzamënt maiú da pert di ghesć y dla jënt dl post dles furnadoies“, á dit l’assessur por la mobilité Florian Mussner. Insciö dessel ince gní armonisé i orars dl trasport publich danter les döes Provinzies de Balsan y Trënt. Tl grup de laur, che gnará istituí tosc, sarál implü ince presënc rapresentanc dles assoziaziuns turistiches de Gherdëna y Badia, dl Uniun di Osć y Ostis y dl’organisaziun Dolomites Superski y dla Fondaziun UNESCO.
rc
