Dala Junta regionala: stüde söl plurilinguism tles scolines ladines
Le stüde gnará fat te trëi agn en colaboraziun cun l’Université da Desproch cun n investimënt de 192.000 euro. Detomas: N proiet por le dagní
La Junta regionala s’á incunté ai 26 d’otober y á tut la dezijiun da deliberé 192.000 euro por n’inrescida aprofondida söl plurilinguism tles scolines ladines. „Al se trata de n proiet ejemplar te döta l’Europa por analisé les dinamiches dles conescënzes linguistiches di mituns y dles mitans ladines mo al sará ince n stüde te n contest plü general dl plurilinguism“, spliga l’assessur regional por les mendranzes linguistiches Giuseppe Detomas.
Le proiet é gnü elaboré y gnará porté inant dal Ciamp Inovaziun y Consulënza dl’Intendënza scolastica ladina dla Provinzia de Balsan „cun l’obietif – insciö él scrit dla deliberaziun – da potenzié y amplié les conescënzes di lingac, da renforzé le plurilinguism, che, sön la basa dles inrescides bele fates dai istituc de formaziun austriaches, s’á desmostré dër importanta por descurí le svilup dles capazités di mituns y por mioré les conescënzes dl lingaz dla uma“. Aladô de chisc stüdi contribuësc le plurilinguism da amplié „la conescënza söl valur dla portignënza etnica cun n svilup positif ince por le svilup cultural y sozial tla comunité de aldiënza.“ L’inrescida, finanziada dala Regiun y realisada en colaboraziun cun le Departimënt d’Inglesc dl’Université da Desproch, ará na dorada de trëi agn. Al é preodü la realisaziun de materai didatics y dla partezipaziun de indöt ot porsones che fajará le monitoraje y l’analisa te chisc trëi agn.
rc
