Ejams de bi- y trilinguism: Da dezëmber iscriziuns ma plü online
Da dezëmber inant sarál poscibl da fá les iscriziuns ai ejams de bi- y trilinguism ma plü online tres la Cherta di sorvisc dla Provinzia.
Na novité por düc chi che ó se scrí ite ai ejams de bi- y trilinguism dla Provinzia é che da dezëmber dl 2016 inant sarál ma plü poscibl da se scrí ite online ales proes d’ejame cun la Cherta di sorvisc. "L'iscriziun online ai ejams de bi- y trilinguism é dër scëmpla", dij l'assessuria por l'informatica Waltraud Deeg, „daimpröma él nezesciar da avëi na Cherta di Sorvisc che é ativa“. Por ativé la Cherta di sorvisc él ma nezesciar da jí te Comun o te n ofize dl Sorvisc di ejams dl Bi- y Trilinguism cun n documënt d’identité varënt. I zitadins cun manco de 18 agn mëss gní acompagná da n genitur.
La condiziun por podëi fá l'iscriziun online é na Cherta di sorvisc ativa y n codesc PIN personal che an po damanè do tl comun de residënza. Do che an á chirí fora sön le portal internet dla Rëi Zivica ci ejam ch'an ó fá y do che an á ativé la Cherta di sorvisc cun le codesc PIN personal pon chirí fora danter i sorvisc pitá, sciöche por ejëmpl l'iscriziun ai ejams o la zertificaziun de titui de stüde. "Sce an á stlüt jö la scora alta te un n lingaz y l'Université te n ater lingaz, spo pon ince damaná le reconescimënt automatich dl livel A dl bilinguism", insciö Deeg.
I vantaji dla digitalisaziun di sorvisc por i zitadins é tröc: i tëmps de resposta da pert di ofizi competënc é plü cörc, an se sparagna la prozedöra lungia da scrí fora a man y mené demez l'iscriziun y cun la Cherta di sorvisc pon ince adoré d'atri sorvisc a livel statal, sciöche por ejëmpl pro l'INPS, pro le Minister por i afars foradecá o pro l'Agenzia dles entrades. De plü informaziuns sön la Cherta di sorvisc pon ciafè por talian y todësch. N’atra novité é ince che l’atestat de bi- y trilinguism gnará mené inant te na forma digitala dal 2017 inant
rc
