Sön papier, online y tres App: Presentaziun dl Dizionar nü a Balsan
Le Dizionar "Ladin Val Badia-Talian / Dizionario Italiano-Ladino Val Badia" dé fora dal Istitut Ladin Micurá de Rü gnará presenté en mercui ai 09/11 a Balsan.
L’Istitut Ladin Micurá de Rü presentará le dizionar nü ai 9 de novëmber a Balsan. Dlungia le dizionar stampé y le dizionar online gnarál presenté ince la App Ladin, na novité importanta che pormët da consulté dai smartphone i dizionars talian-ladin dla Val Badia y talian-gherdëna.
La sëra de presentaziun gnará daurida dai salüc da pert di organisadus Leander Moroder, diretur dl Istitut Ladin y Giulio Clamer, presidënt dl comité da Balsan dla Società Dante Alighieri. N gran onur y plajëi sarál da ascuté sö la linguista Valeria Della Valle che á scrit la prefaziun al dizionar. Ara é professuria al’Université Sapienza de Roma y colaboradëssa scientifica dl dizionar Treccani. Sara Moling, coordinadëssa dl proiet, mostrará sö les carateristiches dl dizionar nü y l’injinier informatich Carlo Zoli, portará dant la novité dl’App Ladin. La sëra gnará abelida dales notes sonades y ciantades da Marta e Ema Moling.
La presentaziun sará
en mercui, ai 9 de novëmber,
dales 18:00
tl salamënt de rapresentanza dl Comun de Balsan,
tla strada Gumer 7.
La manifestaziun vëgn organisada dal Istitut Ladin Micurá de Rü deboriada cun la Società Dante Alighieri – comité de Balsan y cun la partezipaziun dla Consulta Ladina y Comunanza Ladina da Balsan.
rc
