Ju de Frara: do n intervënt de metüda en sigurté strada indô daverta
Arpizadus spezialisá á completé chësta edema n intervënt de metüda en sigurté ampl dla strada che porta söl Ju de Frara. Da püch é la strada indô daverta.
Por aumenté la sigurté dla viabilité sön le Ju de Frara á le Sorvisc Strades dla Provinzia inciarié arpizadus spezialisá da efetué n gran intervënt de metüda en sigurté dla strada statala che porta söl Ju de Frara tla localité de Murfreit. „Tres chësc intervënt él sté poscibl da tó demez tröp material dai parëis de Murfreit y da garantí insciö na maiú segurëza por i autisć y ziclisć tl toch de strada interessé, sciöche bele planifiché tratan l’isté do n pröm intervënt de prescia“, spliga l’assessur por la rëi stradala Florian Mussner.
La strada statala che porta da Sëlva söl Ju de Frara â messü gní stlüta ala fin d’agost dl 2016 por gaujia de plü tomades de peres tla localité Murfreit. Püch daldô á la Provinzia tut la dezijiun da intergní cun n intervënt de prescia y spo sëgn cun n proiet de ressanamënt plü ampl te döes fases cun la pröma fasa che reverda propi chisc laurs de metüda en sigurté di parëis. „Por gaujia dla complessité dl intervënt él gnü damané la colaboraziun a arzipadus spezialisá che é gnüs portá söinsom ai parëis dl grup dl Sela cun le joler“, spliga le diretur dla Repartiziun Sorvisc Strades Philipp Sicher. Por merit dles condiziuns meteorologiches positives él sté meso da rové cun chësta pröma fasa ai 4 de novëmber cun la strada che é indô da püch daverta al trafich. „Deache na sigurté ai 100 porcënt ne é nia poscibla dantadöt sön strades da munt vëgnel sëgn ince studié dötaurela te na secunda fasa dai tecnics dla Provinzia soluziuns alternatives y ajuntives por aumenté insciö tres deplü la segurëza stradala danter Sëlva y le Ju de Frara“, spliga l’assessur Mussner.
rc
Galaria dales fotografies
