Dala Junta: ressané le terzo tunel danter Tlüses y Pontives
Al gnará ressané le tunel sön la strada statala dla Val Gherdëna danter Tlüses y Pontives tl Comun de Laion. La Junta á aprové incö le scomenciamënt di laurs.
Le tunel de 95 metri danter Tlüses y Pontives, tl teritore dl Comun de Laion, é öna dles 6 galaries fates sö danter le 1968 y 1970 por realisé na secunda strada de coliamënt danter la Val d’Isarch y la pert plü alta dla Val Gherdëna. Tl tunel él gnü a se le dé na seria de problems che reverda danter l’ater infiltraziuns d’ega y destacamënc dla pert de petun. Por eliminé chëstes problematiches á la Junta provinziala aprové incö ai 8 de novëmber sön proposta dl assessur por la mobilité y les strades Florian Mussner n intervënt de ressanamënt y á definí les carateristiches tecniches dl’opera. Chësc é un di ejëmpli, á dit le presidënt Arno Kompatscher, dl impëgn dla Provinzia por ci che reverda la manutenziun dla rëi stradala ampla dl Südtirol, aladô de na politica che prevëiga plü mesi finanziars por la manutenziun di coliamënc esistënc en confrunt ala costruziun de strades nöies.
L’assessur Mussner spliga che i laurs dl tunel sön la statala danter Tlüses y Pontives „é preodüs por renforzé la strotöra cun na zementaziun nöia, cun le drenaje dl’ega y le barat dles löms LED dl implant atual.“ Por realisé chësc intervënt él preodü cosć por 1,3 miliuns de euro. Le ressanamënt costant dles galaries vëgn a se le dé sön la basa de na lista de priorités. „Chisc intervënc é nezesciars por aumenté la segurëza dla zircolaziun en general sön les strades dl Südtirol y por modernisé la rëi stradala südtiroleja“, insciö Mussner.
rc
Galaria dales fotografies
