Dala Junta: por bonus energia conzesciun edilizia cina mez 2017
La norma söl bonus energia por le ressanamënt é gnü mudada dala Junta: l’aumënt de cubatöra gnará apliché a chi che ciafa la conzesciun edilizia cina jügn 2017.
La Junta provinziala á aprové incö na mudaziun al sistem de transiziun por ci che reverda le bonus energia, chël che pormët da fá n aumënt de cubatöra: chi che fej domanda mëss ma plü presenté te Comun cina ai 31 de dezëmber dl 2016 la documentziun completa dl proiet, y al basta che la conzesciun edilizia vëgnes conzedüda dal Comun cina jügn 2017.
Le sostëgn dl bonus energia fej referimënt sides ai frabicac bele esistënc co ince ai frabicac nüs y á l’obietif da aumenté l’efiziënza energetica di frabicac. Implü é un di fins chël da avëi n standard plü alt y da motivé da adoré standarg plü alc de chi scric dant dala lege. Le apostadú di laurs vëgn „premié“ cun l’autorisaziun a n aumënt porzentual dla cubatöra. Le regolamënt prevëiga danter l’ater por düc i frabicac (esistënc y nüs) n bonus d’energia dl 15 porcënt por la classa CiasaClima A y dl 20 porcënt por chi che á n standard de CiasaClima A nature. Cina sëgn êl preodü che l’aplicaziun dl bonus energia foss ma varënt cina ai 31 de dezëmber dl 2016, mo deache al é gnü a se le dé de plü problematiches burocratiches da pert di Comuns á la Junta stabilé incö ai 8 de novëmber da amplié la dorada dl’aplicaziun dla norma cina mez jügn 2017. L’assessur por l’ambiënt Richard Theiner spliga che al messará ma gní dé jö te Comun cian ai 31 de dezëmber dl 2016 la documentaziun intira dl proiet y le Comun ará spo tëmp cina jügn 2017 por aprové la conzesciun. Chësta dezijiun dla Junta á bele ciafé n arat positif da pert dl Consëi di Comuns.
rc
