Dala Junta: imparé i lingac, contribuc por jogn y adulc
La Junta provinziala á aprové döes bandides por sovenziuns ai jogn y ai adulc che frecuentëia cursc de n secundo lingaz y de atri lingac aldinfora dl Südtirol.
Löm vërda da pert dla Junta provinziala incö a döes bandides de concurs por la conzesciun de sovenziuns a chi che frecuentëia cursc d’aprendimënt dl secundo lingaz (todësch y talian) y de atri lingac foresć che vëgn tignis aldinfora dl Südtirol (te Südtirol ma cursc por ladin). I cursc mëss mët man danter al 1 de otober dl 2016 cina ai 30 de setëmber dl 2017 y mëss avëi na dorada minima de döes edemes por le secundo lingaz y de trëi edemes por n ater lingaz forest cun almanco 20 ores de insegnamënt al’edema.
Danter les condiziuns por fá domanda él che chi che fej domanda mëss ester zitadins dl’uniun europeica, mëss ester residënc te n Comun dl Südtirol canche ai fej domanda y che al momënt dla domanda ne ái nia complí i 60 agn (por i cursc dl secundo lingaz) y i 50 agn por n curs de n lingaz forest. Al é preodü ince n limit de davagn (depuré) de 30mile euro. Al é poscibl da ciafé l’aprovaziun por al mascimo dui iadi por n cursc de n secundo lingaz y al mascimo 4 iadi por n curs de lingaz forest, 2 iadi por le medemo lingaz.
Les domandes de contribut pó gní presentades dal 1 de jená dl 2017 cina ai 29 de setëmber dl 2017 al Ofize provinzial por le Dërt al stüde universitar, strada Andreas Hofer 17 a Balsan. Al é implü preodü döes tomades ai 31 de jená y ai 30 de jügn che sará tapes d’ejaminaziun dles domandes por paié fora tresfora i contribuc. Por chësta forma de sostëgn á la Junta preodü n investimënt de indöt 930mile euro. Al podess ester che i mesi finanziars vëgn aumenté sce debojëgn.
rc
