Dala Junta: plü sigüda la strada por le Ju de Valparola
La strada provinziala che porta da San Ciascian direziun ju de Valparola gnará ressanada y metüda en sigurté dala Provinzia.
La Junta provinziala á stabilí incö ai 15 de novëmber da aprové les carateristiches tecniches dl intervënt por la sistemaziun y metüda en sigurté dla strada provinziala che da San Ciascian porta al Ju de Valparola (SP 37) sön le confin danter les Provinzies de Balsan y Belun. „Por podëi ti garantí a düc i autisć y anuzadus dla strada la sigurté plü alta poscibla gnará n toch dla strada, zirca 500 metri, spostada plü tl vers dla valada y al gnará ince realisé na bariera cuntra la tomada de peres“, spliga l’assessur por la viabilité Florian Mussner. Por aumenté ciamó deplü la sigurté gnarál ince renofrzé la strada tla trassa interessada por zirca 200 metri cun la realisaziun de na picera bariera de proteziun ajuntiva. Por la realisaziun dl intervënt él preodü n investimënt complessif de indöt 2,2 miliuns de euro. Do l’aprovaziun dles carateristiches tecniches sará sëgn le proscim vare le start dla proietaziun d’’esecuziun dl’opera.
USP
