Dala Junta: Agenzia apalc, start por i controi dl’unité Audit
Mioré l’ativité, garantí la trasparënza: les diretives söi controi dl’unité dl Audit por les prozedöres dl’Agenzia di apalc é gnüdes aprovades.
La lege provinziala söi apalc prevëiga che almanco le 6 porcënt de dötes les gares vëgnes monitoré, cun controi a estraziun, da pert de n unité Audit aposta. Incö ai 15 de novëmber á la Junta provinziala aprové les condiziuns por le laur dl organ aprovan la delibera proponüda dal presidënt dla Provinzia Arno Kompatscher. „L’unité de Audit ne garantiará nia ma la trasparënza y la sigurté de dërt – sotlignëia Kompatscher – mo ara dará ince n contribut concret por mioré döta l’ativité dl’agenzia di apalc. L’Audit ará le compit da valuté cares che é les poscibilités de mioramënt y de coreziun dles dificoltés.“ L’unité Audit sará insciö ativa bele cun la fin dl ann 2016 cun na seria de controi a estraziun.
Al gnará analisé insciö 8 prozedöres: n afidamënt diret, n afidamënt tres n acord de crëta, döes bandides sot y sura la cuota de relevanza europeica di 200mile euro, implü ciamó döes prozedöres davertes y spezifiches cun na soma plü alta di 200 mile euro. „Chësta sará ciamó na fasa de monitoraje y ejaminaziun por mët man spo cun l’ativité de control tl 2017“, spliga Kompatscher.
Les ativités de control da pert dl’unité de Audit sara chëres che reverda l’afidamënt de contrac publics de laur, sorvisc de interes provinzial, apalc, conzesciuns, contac danter publich-privat y surandades inhouse. Al ne gnará nia controlé les ativités di Comuns (l’operaziun de control ti speta al Consorz di Comuns) y les prozedöres gnará finanziades en döt o en gran pert dala Uniun Europeica. L’Audit ará le compit da valuté le respet dles normes de lege varëntes, les condiziuns de partezipaziun, la nominaziun dles comisciuns tecniches, les motivaziuns dla dezijiun finala y l’assegnaziun dl’inciaria. Sce al ess da gní a se le dé condiziuns iregolares spo sará l’unité che messará arjigné ca na relaziun anuala da presenté ala Junta provinziala che mëss ince gní informada, vare por vare, de problems che gniss a se le dé tratan i controi.
USP
