Furnadoies: 371 implanc tl Südtirol dl 2015
Le svilup dl setur dles furnadoies tla provinzia de Balsan danter le 2014 y le 2015 vëgn documenté te na publicaziun dl Ofize Furnadoies publicada dan da püch.
Ai 31 de dezëmber dl 2015 êl tl Südtirol 371 implanc a föm en funziun che condejô indöt 522.677 porsones/ora. Chësc é da lí tla publicaziun "Impianti a fune in Alto Adige 2015" dl Ofize Furnadoies dla Provinzia. Insciö é la provinzia al terzo post, sce an fej n confrunt cun i raiuns geografics dlungia, do le Tirol che arjunj le pröm post sides por le numer de implanc (1.072) che por le numer de porsones al’ora (1.475.361 porsones/ora) y do le Land Salzburg che é al secundo post cun 556 implanc y 780.866 porsones al’ora y dan le Trentin cun 231 implanc y 349.730 porsones/ora.
Sce an mët en relaziun le numer de implanc cun la suraspersa teritoriala, é le Südtirol cun 50,1 implanc por 1.000 km², do le Vorarlberg, le Tirol y Salzburg. Ma le 0,5% dla suraspersa dl teritore dl Südtirol vëgn adoré por jí cun i schi.
Tl Südtirol rapresentëia i implanc a föm por l'assessur provinzial por la mobilité n setur zentral dla politica dla mobilité, y chësc nia ma ajache al é mesi sostenibli dal punt d’odüda ambiental, mo ince ajache an ne pó nia fá a manco por la competitivité dl turism da d’invern, y por chëstes rajuns mëssi gní tresfora modernisá. Le setur dles furnadoies é dër important cun n valur de produziun de 287,7 miliuns de euro y dá impulsc importanc por l'economia locala, dij l'assessur Mussner.
Dl 2015 él gnü fat cin implanc nüs, n valgügn ince tles valades ladines.
Te Gherdëna, tl raiun dai schi “Plan de Gralba“ él gnü baraté fora la furnadoia “Piz Sella 2“, fata sö dl 1984, cun na furnadoia moderna da sis posć, olache al vëgn condüt 2.190 porsones al’ora. Sön Plan de Corones él gnü fat sö danü, tl cheder dla planificaziun de Puster, l’implant a cabines “Belvedere”, olache les carateristiches tecniches é romagnüdes anfat, mo al s’á mudé la velozité. A Corvara él gnü baraté fora la furnadoia da cater posć “La Fraina” cun na furnadoia moderna da sis posć cun segurëza por mituns. Te chësta ocajiun él gnü alzé le numer de porsones al’ora a 2.200 porsones al’ora. A Corvara él gnü ascorté de 225 m le lift da trá “Capanna nera”.
Sciöche vigni agn é le ciamp de planificaziun, olache an registrëia le maiú numer de porsones al’ora, Gherdëna-Munt Suc cun 111.406 porsones/ora, spo l’alta Val Badia (83.626 porsones/ora) y spo Puster (66.407 porsones/ora). La publicaziun "Impianti a fune in Alto Adige 2015", scrita da Johann Zelger dl Ofize Furnadoies, é da ciafé sön papier tl Ofize Furnadoies, sön Plaza Silvius Magnago 3, a Balsan, tel. 0471 41 46 00, fax 0471 41 46 16 o pó gní desćiariada jö tl format pdf dala plata internet.
osp
Galaria dales fotografies
