Fujiun, en domënia referendum consultif te Fascia
Cina les 21.00 sarál poscibl da dé jö la usc en domënia ai 20 de novëmber por la fujiun di Comuns de Poza, Vich, Mazin y Soraga.
En domënia, ai 20 de novëmber dl 2016, vëgnel tigní dales 8.00 ales 21.00, ti Comuns de Poza, Vich, Mazin y Soraga le referendum consultif por mëte sö le “Comun de Sèn Jan”. Indöt él 3.550 porsones che pó lité sön l'unificaziun de sü comuns, plü 112 porsones che vir al ester.
Por che le referendum veles mëssel tó pert te vigni comun altamo le 40% dles porsones che pó lité. Chi che á la residënza al ester ne gnará nia compedá lapró por determiné le numer che vá debojëgn por che le referendum veles, ince sce ai pó lité. Le referendum arjunjará n resultat negatif, sce al ne sará nia altamo le 50% dles usc dades jö che vel a öna ti Comuns de Poza y Vich. La validité dl referendum (arjunjimënt dl quorum dl 40 porcënt stlüt fora les porsones scrites ite tl'AIRE) y le resultat positif dl referendum (maioranza dles usc por la fujiun) ti atri dui Comuns de Mazin y Soraga portará pro indere a conseguënzes ma te chël Comun. I litadus di Comuns de Mazin y Soraga ne podará nia determiné le “falimënt” dl referendum por la fujiun de Poza y Vich (no ne padarái “salvé” le prozedimënt de fujiun sce tl comun de Poza y/o Vich ne vëgnel nia arjunt le quorum dl 40 porcënt o la maioranza dles usc a öna).
Les usc gnará cumpedades do avëi stlüt les seziuns y i resultac gnará publicá sön la plata internet dla Regiun (www.regione.taa.it).
osp
