Incuntada Kompatscher-Juncker: dagní dl’UE, defenüda, migranc, regiuns
Europa, migraziuns, rode dles Regiuns: chisc é stá n valgügn temesc che le presidënt Kompatscher á afronté cun le presidënt dla Comisciun UE Juncker.
Sciöche impormetü dal presidënt dla Comisciun europeica dan da n ann da fá na vijitá tl Südtirol en ocajiun de n convëgn söl’Europa á Jean Claude Juncker mantigní incö ai 18 de novëmber süa impormetüda en ocajiun dla conferënza di „70 Agn Acordanza de Paris: autonomia y federalism t’Europa“ organisada dala Provinzia adöm cun l’Université. Denant de tó pert al convëgn é Juncker gnü saludé a Balsan dales 10:20 sön plaza Silvius Magnago dal Presidënt dla Provinzia Arno Kompatscher cun la zerimonia tradizionala de begnodü (“landesüblicher Empfang”) adöm a na delegaziun di Scizeri. Tl ofize dl Landeshauptmann él spo gnü a se le dé n’incuntada danter i dui presidënc por zirca mes’ora. De plü é stades les tematiches tratades da Kompatscher y Juncker, cun tl zënter danter l’ater l’atuaziun dl prozes d’unificaziun europeica. Trami dui é stá a öna che la nezescité da respeté les dezijiuns che vëgn tutes a livel europeich mëss ince gní portades inant da düc i Stac mëmbri. Te chësc contest él ince gnü sotligné l’importanza dla coejiun y dla solidarieté al intern dl’Uniun europeica.
Le presidënt Juncker á detlaré che l’Europa pó ma funzioné sce les dezijiuns tutes deboriada vëgn ince atuades. „I Stac mëss lauré por realisé les deliberes aprovades a livel europeich y desmostré ince cui fac la solidarieté”, á recordé Kompatscher. Le presidënt Juncker á anunzié che por le fin dl mëis sarál la Comisciun che presentará propostes por jí inant cun na politica europeica de segurëza y defenüda. Propi sciöche ince por ci che reverda la migraziun él important da atué mosöres de politica estera y sigurté di Stac che, sce tratades adöm, a plü poscibilité da gní aplicades cun resultac efetifs por düc i Stac mëmbri. Tratan le discurs él ince gnü rajoné dl’atuaziun dl Plann europeich di investimënc tl Südtirol, conesciü sciöche “Plann Juncker”, che prevëiga n sostëgn por i proiec transfrontaliers de investimënt. Al se trata de finanzié investimënc publics y privac nezesciars por le sostëgn al’economia reala che reverda les piceres impreses y chëres mesanes, l’archirida, l’inovaziun y l’energia. Le stromënt prinzipal é le Fonds europeich por i investimënc strategics (FEIS).
Tratan l’incuntada cun Juncker á Kompatscher ince recordé de plü punc che reverda la politica regionala, danter l’ater l’agricoltöra da munt, le mantignimënt di fonds strotorai do le 2020 y la strategia EUSALP dla macroregiun alpina (5 Paisc, 48 regiuns y 70 miliuns de abitanc). Denant co jí inant al’Université por le convëgn á Juncker y Kompatscher ince debatü dla sconanza dles mendranzes: le Presidënt dla Provinzia á recordé la scomenciada por i zitadins europeics “Minority Safeback” metüda en pe dala FUEN (Federal Union of European Nationalities) por ci che reverda i dërc dles mendranzes por sconé les porsones che fej pert de mendranzes linguistiches y che renforzëia les desfarënzes culturales y linguistiches al intern dl’UE. Juncker y Kompatscher é ince a öna por ci che reverda le rode dles Regiuns por le svilup dl’Europa: les Regiuns é n anel zentral de coejiun danter i zitadins y l’Europa é ince porchël él important che le Comitê dles Regiuns ciafes tres deplü importanza y atenziun da pert dles istituziuns europeiches.
USP
Galaria dales fotografies
