Dala Junta: finanziamënt por le documentar „Ladinia“
Aprovaziun dala Junta provinziala por le finanziamënt de 8 produziuns por 105 dis de produziun tl Südtirol. Le davagn preodü söl teritore é de 1,8 miliuns.
La Junta provinziala á dé süa aprovaziun ala terza pert di finanziamënc dl 2016 por le sostëgn di films, dles fiction y di documentars realisá tl Südtirol. I esperc dla comisciun y dla IDM Südtirol, l’Aziënda speziala por l’economia, á chirí fora i 8 proiec da sostigní tres le Fonds südtirolej dles produziuns.
La condiziun por ciafé n finanziamënt publich é chëra che les produziuns televisives y cinematografiches reinvestësces tl Südtirol almanco le 150 porcënt de chël che ai á ciafé. Por le terzo call él gnü presenté 19 proiec. La Junta provinziala á aprové, sön la basa de na valutaziun dla comisciun d’esperc y dla IDM, da finanzié 8 produziuns cun zirca 945 mile de euro indöt. La retüda economica söl teritore di proiec ametüs, á recordé le presidënt Kompatscher, é stimada sön n davagn de 1,8 miliuns de euro.
Les produziuns reverda cater films, trëi documentars y na serie tv todëscia. Al é preodü indöt 105 dis de produziun y de laur cun i aturs, esperc y fornidus de sorvisc südtirolej. „Al se trata de na fujina locala che tol ite indöt cincanta categories profescionales y che reverda sides i artejans co ince les impreses locales“, á ajunté Kompatscher. Döes produziuns finanziades é südtirolejes, öna dal rest dla Talia, trëi dala Germania, y öna dala Francia y Svizera. I dui proiec südtirolej é n film de documentaziun de Karl Prossliner y le documentar „Ladinia“ de Jutta Kusstatscher.
USP
