Dala Junta: ajorná i criters por i contribuc ales malghes
La Junta provinziala á aprové i criters nüs por la conzesciun de aiüt por la gestiun dles malghes dl Südtirol en aplicaziun dl regolamënt europeich dl 2014.
I criters de sostëgn nüs é gnüs aprová incö ai 22 de novëmber sön proposta dl assessur por l’agricoltöra Arnold Schuler y definësc i intervënc da sostigní por mantigní y mioré la gestiun dles malghes (pastöres y infrastrotöres), por la proteziun dl ambiënt y l’adatamënt dla produziun agricola al svilup dl marcé. Implü vëgnel ince regolamenté la conzesciun di aiüc. Le jí a munt tles pastöres naturales mëss avëi na dorada de almanco 60 dis. Al se trata de mudaziuns formales plü co sostanziales en confrunt ai criters da denant che sará varënc cina le 2020 y che jará a bëgn di Comuns, dles assoziaziuns y dles impreses agrares y dles aministraziuns despartides dai bëgns y adoranza zivila.
I aiüc pó ester conzedüs por la costruziun, le ressanamënt y l’adatamënt di frabicac da munt cun n’adoranza agricola y implanc che é nezesciars por le mantignimënt y le mioramënt dl’ativité agricola y dles condiziuns de laur, por la realisaziun y le renovamënt dles infrastrotöres por na gestiun regolara dl jí a munt, por la costruziun de strades d’azes ales pastöres sciöche ince por la recostruziun do desgrazies naturales o por guajia de condiziuns atmosferiches de gran desvantaje. Les domandes de aiüt pó gní presentades dal pröm de jená cina ai 28 de forá de vigni ann mo tres denant che i laurs mët man. I aiüc pó curí cina al mascimo le 50 porcënt di cosć ametüs che vëgn calcolá söl numer di armënc söles pastöres, sön la spersa dla pastöra y söl personal nezesciar.
Tl teritore südtirolej él dötadöm 1739 malghes che á n rode fondamenal por le mantignimënt dla contrada südtiroleja, por l’economia tl setur y por la proteziun di terac dal’erojiun y le mantignimënt dl paesaje südtirolej. I terac de pastöra é dötadöm 104mile y al se trata de malghes che é da ciafé scialdi tres sura le limit di bosć y lëgns.
USP
