Dala Junta: ok al contrat coletif por 9mile insegnanc
La Junta provinziala á aprové la sotescriziun dl contrat coletif por le personal didatich cun 80 euro brutto implü de davagn y plü atenziun ala familia.
N aumënt de davagn gnará a se le dé ti proscims mëisc por indöt 9mile insegnanc y educadus dles scores elementares, mesanes y altes. La Junta provinziala á autorisé incö ai 22 de novëmber l’assessuria por le personal Waltraud Deeg da firmé le contrat coletif provinzial meton ince a desposiziun i mesi nezesciars por le 2016 de indöt 3,2 miliuns de euro. Le contrat coletif nü prevëiga les medemes mosöres bele stabilides dal contrat de „intercomparto“ por i dependënc dla Provinzia, dla sanité, di Comuns y dles Comunités raionales, dles ciases de palsa y dl IPES. Al se trata d 40 euro implü tla busta paga (cun mëteman de jügn 2016) a chi che al jará lapró 40 euro cun le mëis de ma 2017 por na soma complessiva de 80 euro brutto. Ince i insegnanc y educadus ará le dërt a n aumënt pro les palses de paternité y maternité che podará gní damanades cina ai 12 agn di mituns (cina sëgn é le termo de 8 agn).
„Al é sté poscibl da rové a contlujiun te na manira asvelta ince por ne perde nia les ressurses finanziares a desposiziun. Porchël ne él nia gnü traté la pert che reverda la previdënza complementara, mo la desponibilité da traté resta“, spliga l’assessuria Deeg. Le contrat coletif provinzial nü mëss ciamó ciafé l’aprovaziun da pert dl Minister competënt y de dötes les perts interessades por jí en fora spo tres la publicaziun tl Boletin ofizial dla Regiun Trentin – Südtirol.
USP
