Consulta por la familia, valorisé l’assistënza al’infanzia
Profil profescional nü por assistënc al’infanzia, criters por i contribuc, bilanz 2017. Chisc é stá i temesc prinzipai dla sentada dla Consulta por la familia.
La Consulta por la familia é n organ de consulënza por la Junta provinziala por ci che reverda les tematiches dla familia y te na manira particolara por ci che reverda la legislaziun y l’atuaziun de mosöres. La consulta á ince le compit da fá propostes da mené spo inant ala Junta por adaté les normes provinziales. Propi te chësc contest á l’assessuria provinziala por la familia Waltraud Deeg traté la poscibilité da mët ite le profil profescional dl assistënt por l’infanzia tl catalogh provinzial dles competënzes. “Düc é a öna che chëstes figöres profescionales mëss gní valorisades cun ince condiziuns de laur plü bunes tres n contrat d’integraziun da firmé danter sindacac y cooperatives soziales”, á splighé l’assessuria Deeg. Le rode di assistënc por l’infanzia é fondamental deache ai se crüzia dla cura di mituns danter i 0 cina ai trëi agn, insciö Deeg.
Le diretur dla Repartiziun Finanzes, Giulio Lazzara, á indere presenté ala consulta n valgügn dac zentrai dl bilanz de previjiun 2017 che reverda ince la formaziun, les families y le sozial. La Consulta á te chësc contest ince recordé l’importanza da ne renforzé nia ma le sostëgn finanziar diret, mo ince le sostëgn por ci che reverda i sorvisc dl’assistënza extra-scolatsica, i zëntri Elki, i stipendiums, le Sparagn Ciasa, la consulënza y tröp d’ater. “Le rode dles families mëss ester fondamental nia ma tl bilanz provinzial, mo ince en general te döta la sozieté südtiroleja”, insciö Deeg.
Michaela Stocker dl’Agenzia por la familia á presenté les mudaziuns pro i criters por ciafé contribuc, cun prozedöres plü scëmples y asveltes. I mëmbri dla Consulta é atualmënter Gudrun Schmid y Gerhard Mair dl’Agenzia por les families, Alexander Nothdurfter por la Federaziun por le sozial y la sanité, Fernanda Mattedi Tschager y Roberto Pompermaier por le VKE, Olav Lutz y Martina De Zordo por le Südtiroler Jugendring y Anna Graber sciöche Garanta por l’Infanzia y l’adolescënza.
USP
