Dala Junta: radon, esperc por relevamënc y mosöres decuntra
La Junta provinziala á tut la dezijiun da ciafé esperc che dess fá relevamënc dl radon tles 197 frabiches scolastiches y provinziales.
Tl Südtirol é la situaziun dl radon sot a control da agn sön la basa dl’esperiënza fata da de plü agn sön chësc aspet important por la sanité publica. Le laboratore de chimica fisica dl’Agenzia provinziala por l’ambiënt á efetué ti ultims agn na seria de controi y mosöres söl radon tles scolines, scores elementares, mesanes y altes y te dötes les frabiches provinziales. Al é gnü a se dé registraziuns cun n valur sura le termo di 500 Bq/m³ (Becquerel al meter cubic) che vëgn conscidré dala legislaziun taliana n valur plü alt de conzentraziun mesana por l’esposiziun dl gas radon ti contesć de laur sciöche les scores y i ofizi.
Sön proposta di assessurs por la formaziun Christian Tommasini, Florian Mussner y Philipp Achammer á la Junta provinziala tut la dezijiun da selezioné esperc por fá relevamënc dl radon tles 197 frabiches scolastiches y provinziales por definí intervënc de ressanamënt. Sciöche pröm vare á la Junta provinziala aprové le scomenciamënt de na prozedöra europeica tres l’Agenzia pro i prozedimënc y le control dla materia di contrac publics por ti surandé l’inciaria dl sorvisc a esperc dl setur.
Le sorvisc sará partí sö te trëi perts: analisé l’infiltraziun de radon, la proietaziun dl intervënt (sce nezesciar) y le control dl’efiziënza dla bonifica dles frabiches publiches. La bonifica messará garantí che le livel de conzentraziun dl valur mesan anual de radon te dötes les frabiches publiches sides arbassé da 500 a almanco 300 Bq/m³. Por chësc intervënt él preodü na spëisa de 790mile euro por i agn 2017-18.
USP
