Jus incër le Sela: firmada l’acordanza Südtirol-Trentin
Acordanza danter les Provinzies de Balsan y Trënt, i Comuns de Sëlva y Cianacëi y la Val de Fascia: mësa tecnica sön la mobilité söi Jus incër le Sela.
La mësa tecnica de coordinamënt dla mobilité söi Jus dolomitics é gnüda formalisada ai 30 de novëmber a Balsan cun la sotescriziun de n’acordanza programatica. L’acordanza é gnüda sotescrita dai assessurs provinziai Florian Mussner (mobilité) y Richard Theiner (ambiënt) adöm al assessur trentin Mauro Gilmozzi. Al fej ince pert dl proiet i ombolc de Sëlva y Cianacëi, Roland Demetz y Silvano Parmesan, sciöche ince la produradoura dl Comun General de Fascia, Elena Testor, y i suranstanc dles assoziaziuns turistiches de Gardëna y Alta Badia.
Danter i compic dl grup de laur él la definiziun de n calënder y di orars di „Green Days“ (i dis cun stlütes al trafich) sön le Ju de Sela cun scomenciamënt d’isté 2017, da garantí la regolarité y l’efiziënza di Green Days cun na comunicaziun abonora, controi y la partezipaziun di operadus turistics. Les mosöres reverda ince la promoziun dla mobilité sostenibla (e-bike, corieres sostenibles) cun n monitoraje constat dl passaje di auti privac. „I Green Days sará n esperimënt por odëi sciöche chësta forma de sconanza particolara funzionëia por mët sot a proteziun ciamó deplü na contrada tan sensibla sciöche chëra dles Dolomites“, á splighé l’assessur Theiner recordan che tratan les sarades sará les strades ma davertes por chi dla roda, chi che vá a pe y i veicui che funzionëia cun na traziun eletrica.
„Implü él ince sön le program da coordiné i iadi di mesi dl trasport publich danter Südtirol y le Trentin tolon ince ite les furnadoies söi jus“, á dit l’assessur por la mobilité Florian Mussner. Al é ince planifiché da potenzié les plazes da parchené por i auti y por les rodes. „Al ne se trata insciö nia de na proibiziun da passé cun i auti, mo de n manajemënt general cun l’obietif da pité na mobilité integrada“, á sotrissé l’assessur trentin Mauro Gilmozzi. Na fasa dër importanta é la planificaziun dles mosöres cun la partezipaziun de dötes les assoziaziuns y istituziuns interessades. Le proscim vare sará sëgn da planifiché l’otimisaziun di coliamënc cun i mesi dl trasport publich.
USP
