Referendum: na lita responsabla söla Costituziun
L’invit dl presidënt dla Provinzia Arno Kompatscher é chël da tó pert ala consultaziun söla reforma dla Costituziun, la basa dl sistem democratich.
La consultaziun referendara de domënia ai 4 de dezëmber, sotlignëia le presidënt Kompatscher, é „n passaje important por la vita zivila, politica y istituzionala dl Stat, dles Regiuns y de nosta Autonomia“. L’invit dl presidënt Kompatscher á düc chi che á le dërt da jí a lité é chël da „analisé le contignü dla reforma“, da se informé sön les mudaziuns y da nen valuté les conseguënzes, „ince sce i sun cosciënc che al ne é nia tres saurí da analisé düc i detais.“ Mo chësc é n compit che le zitadin dess ademplí, „deache la tematica de chësta lita é la Costituziun, chël ó di la basa iuridica che regolamentëia le sistem democratich“.
Kompatscher recorda che i zitadins é damaná da dé jö so arat söla reforma costituzionala litada tl Parlamënt, „y spo stada tl zënter de na campagna referendara cun debatüdes datrai ince scraiëntes, che ne á nia albü tl zënter la tematica dla lita. I messun indere se fistidié da rové al punt zentral dla chestiun.“ L’apel dl Presidënt é insciö chël da jí a lité, da ademplí al dërt fondamental de vigni zitadin da tó pert ala lita, „se basan sön i contignüs dl referendum. Insciö sarál poscibl da dé n contribut responsabl ince por le svilup dl Südtirol“. Kompatscher recorda che le resultat dla consultaziun sará te vigni moda varënt, deache al ne é preodü degun cuorum. En domënia ai 4 de dezëmber sará les sëntes litales davertes dales 07:00 ales 23:00.
USP
