Publicaziuns ladines: Danman le secundo numer de Birba
La secunda ediziun dla revista por mitans y mituns dai 8 ai 12 agn trata la tematica dl „scür“. Por le dagní él preodü döes ediziuns anuales.
„Birba 2“ é l’inom dla revista nöia publicada y realisada dl Ciamp Inovaziun y Consulënza y ponsada por i mituns da scora da n’eté danter i 8 y i 12 agn. Sce le pröm numer de Birba â sciöche tematica prinzipala le viajé y presentâ na seria de mesi de trasnport alternatifs, é l’argomënt prinzipal dl numer gnü fora dan da püch le „Scür“. Cun l’aiüt de contribuc laurá sö te na manira scëmpla y plajora descëda Birba interes y coriosité y i pici leturs impara insciö da conësce miú y plü davijiun, mo ince te na manira plü sota y spezifica le monn te chël che i viun. Cun na palëta ampla y rica de temesc ti baia Birba ados ai scolars dles ultimes classes dla elementara y dla pröma mesana cun conzec elementars y scëmpli, i tesć é saurisc da capí y basëia sön n conzet pedagogich tler y bun strotoré. Na gran atenziun ti á la redaziun de Birba dé al’ adoranza de n lingaz strotoré bun, cun n lessich adaté al’eté dui mituns tignin cunt dles poscibilités de interaziun y dles ghiranzes dl publich jonn.
Le sföi é gnü publiché te döes variantes, öna tl ladin dla Val Badia y l’atra por Gherdëna. Implü ciafon laité ince tesć por todësch y talian y inglesc che pîta de bones poscibilités d’eserzitaziun tl plurilinguism y ince da se möie tla interdisciplinarité. La publicaziun nöia pîta insciö n moscedoz zint de informaziuns cörtes y compates. Un di fins prinzipai dla revista é chël da ti trasmëte ai mituns tambëgn informaziuns generales co ince n cer savëi de valüta enciclopedica, mo dagnora metü dant te na manira saurida da rezepí y da „digerí“. Tres na spezialisaziun di contignüs ciafa i mituns tla revista „Birba“ de vigni sort de informaziuns y momënc de aurela cörta, ai ciafa respostes scëmples a sües tröpes domandes y impara sovënz ince da i jí plü a funz a cosses che ai orô magari dagnora bele savëi.
La redaziun dl sföi nü ti á dé ince na gran importanza ala creaziun dl layout plü adaté al’eté, chësc ince por le fat che mituns é aldedaincö oticamënter y stilisticamënter bele ausá a standards scialdi alc. Por ci che reverda le conzet formal dla revista, incontunse chiló laite n livel de complessité che corespogn avisa ales capazités rezetives de n publich danter 8 y 12 agn. Le responsabl dla redaziun dl sföi „Birba 2“ é le diretur dl Ciamp Inovaziun y Consulënza Felix Ploner, i tesć y contignüs é gnüs realisá dal Departimënt Educaziun y Cultura Ladina en colaboraziun cun Maddalena Aliprandi, Manuela Dasser, Alice Dellantonio, Erna Flöss, Ute Senoner, Ulrike Maierhofer Kostner, Giovanni Mischí, Claudia Rubatscher y Daria Valentin. La grafica y les ilustraziuns é na produziun de „MarameoLab“, Nesia Anindita „Serafina“ y Zetelaki Eszter „La cité de nöz“.
Sciöche revista ón porvé da la fá gní fora te n conzet fis y te n ritm regolar: ara dess gní fora dui iadi al ann y vigni iade svilupé n’atra tematica. Da ciafé é la revista nöia pro le Ciamp Inovaziun y Consulënza tres la misciun internet: www.pedagogich.it o al numer de telefon 0471 / 41 70 30.
USP
Galaria dales fotografies
