Reformé deboriada: sëres de dialogh a San Martin y Urtijëi
Te döes incuntades dan da püch él gnü coiü adöm informaziuns por elaboré la proposta de mudaziun dla lege provinziala che reverda i organs colegiai scolastics.
Cöi adöm propostes y se confronté cun les idees de düc i grups d’interes tl monn dla scora: chisc é stá i obietifs prinzipai dles döes sëres de discusciun te Gherdëna y tla Val Badia en cunt dla reforma dla lege provinziala söi organs colegiai dles istituziuns scolastiches. Deache la lege nazionala 107/2015 á porté n valgönes mudaziuns al’organisaziun dl sistem scolastich y ala strotöra di organs colegiai, él sëgn debojëgn da les adaté ales desposiziuns provinziales che regolamentëia les formes de partezipaziun ala gestiun dles scores y scolines. Cun i tecnics dles Repartiziuns scolastiches al laur por lauré fora n dessëgn de lege á l’Intendënza ladina metü da jí ince döes sëres de dialogh por cöi adöm propostes y idees da pert de düc i interessá al prozes de mudaziun dla lege.
La pröma sëra é gnüda tignida a San Martin y la secunda a Urtijëi. L’assessur provinzial Florian Mussner á sotrissé te so salüt l’importanza de na bona partezipaziun de dötes les componëntes tla comunité dla scora, deache ara é la fondamënta por na discusciun democratica y por podëi tó les dërtes dezijiuns. Ince sce la scora vëgn tresfora confrontada cun problematiches nöies y complesses, á l’assessur invié i mëmbri dl sistem formatif da tó sö chëstes desfides cun otimism y da adaté la scora ladina ales esigënzes dl dagní.
Do na cörta relaziun dl ispetur Albert Videsott á la moderadëssa Ilke Senoner invié les rapresentantes y i rapresentanc di geniturs, di studënc, di direturs, di insegnanc y dl Departimënt da se senté pro na mësa torona por baraté fora esperiënzes, minunghes y posiziuns in cunt dla partecipaziun te scora y di organs colegiai. Tratan la discusciun él gnü fora na gran convinziun che la partezipaziun y la comunicaziun danter düc i partners dl’educaziun é la condiziun essenziala por che i trus formatifs dles scolares y di scolars pois garaté. Por ci che reverda i organs colegiai, vëiga tröc le bojëgn da i scemplifiché y da i adaté ala realté y ales esigënzes d’aldedaincö. I rapresentanc di geniturs y di studënc á sotrissé che le pröm vare por na bona colaboraziun é la comunicaziun, la trasparënza y l’informaziun in cunt de dötes les ativités dla scora. De chësc vers él gnü fat la proposta de mët a jí formaziuns aposta por geniturs y studënc sura i compic y le funzionamënt di organs colegiai.
L’intendënt por les scores ladines Roland Verra á stlüt jö dijon che „le resultat plü important de chëstes incuntades é che an á sintí la desponibilité di presënc al dialogh y a se impegné tla democrazia scolastica te n contest de respet y partezipaziun.“ Al á rengrazié por les tröpes propostes y invié düc i componënc dles comunanzes scolastiches ladines da jí inant söl tru dla partezipaziun, desmostran tresfora respet por les minunghes desvalies y ince por les dezijiuns che vëgn tutes do na discusciun democratica.
Proscimamënter él i tecnics di Departimënc scolastics che s’incunta por lauré fora na proposta de lege che dess rové te Junta por l’aisciöda. Do la löm vërda da pert dla Junta y spo dla comisciun legislativa gnará le dessëgn de lege debatü tl Consëi provinzial.
usp
Galaria dales fotografies
