Dala Junta: ressanamënc dla rëi stradala sön i Jus de Furcia y Sela
La Junta provinziala aprovëia cin proiec de mioramënt dla strada sön Furcia y tl Comun de Sëlva, tla Val Passiria, a Hafling, sön la MeBo a Lana.
Sön proposta dl assessur Florian Mussner, á la Junta provinziala fat fora incö les carateristiches tecniches y l’impëgn finanziar (zirca 9 miliuns de euro) por n valgügn proiec de mioramënt y metüda en segurëza dles strades te döta la provinzia. “Dan da püch él gnü scrit fora trëi de gragn proiec che reverda l’entrada tla Val Badia, l’azes zentral ala cité da Porsenú y la zirconvalaziun da Maran, mo a é ince tl laur da realisé de mëndri proiec sön döt le teritore provinzial”, spliga l’assessur Mussner.
"La segurëza y la condiziun dles strades á la mascima priorité. Tres chisc cin proiec junse inant cun i investimënc y orun antergní por fá a na moda che i tuní sides plü sigüs y che i punc y i mürs stradai de sostëgn sides plü stabii", spliga Mussner. Düc i laurs vëgn fac aladô de na lista de priorités prezisa tolon en conscidraziun, sciöche an vëiga ince dal’aprovaziun dles deliberes dla Junta, düc i raiuns dla provinzia. La Junta á porchël aprové les carateristiches por i laurs de recostruziun de cater punc sön la statala de Gherdëna tl comun de Sëlva, cuntra le Ju de Sela. I intervënc reverda le flus dl’ega, la stabilité y la portada. La spëisa complessiva é de 783mila euro. Al jará indere debojëgn de zirca 740mila euro por i laurs de ressanamënt di mürs de sostëgn sön na trassa de 1,5 km dla strada provinziala sön Furcia.
N ater proiet reverda le ressanamënt dl punt sön la MeBo cuntra süd tl Comun de Lana: an antervëgn por tó y jí cun i dagns ala suraspersa dl punt lunch feter 380 metri y por alzé la stabilité. Les mosöres tecniches prevëiga na spëisa de zirca 960mila euro. La Junta á ince aprové le proiet de ampliamënt por fá a na moda che la zircolaziun sides plü sigüda sön la statala dla Val Passiria sön na trassa de 1 km danter i Comuns de Riffian y San Martin. Al gnará lauré sön n valgügn punc prigorusc jödapé y sönsöm; al vëgn sciazé n cost de 2,95 miliuns de euro. Al é ince gnü definí i intervënc de deslariamënt dl tunel de Santa Caterina (400 metri) sön la strada provinziala Mölten-Hafling tl Comun de Hafling, che tol ite stüdi geologics, intervënc ai portai y revestimënc di tuní; al vëgn preodü na spëisa de zirca 3,5 miliuns de euro.
usp
