Kompatscher a Viena al iuramënt dl presidënt Van der Bellen
N apel ala democrazia, al'unité, ala crëta: Arno Kompatscher comentëia dala festa a Viena le pröm discurs dl presidënt nü Van der Bellen.
Le presidënt dla Provinzia Arno Kompatscher á tut pert incö a Viena ala festa d’insediamënt dl nono presidënt dla Republica austriaca, Alexander Van der Bellen. Tl salf storich dl Reichsrat á le Presidënt juré dan l’indunada federala, metüda adöm dal Nationalrat (le Parlamënt) y dal Bundesrat (la secunda Ciamena, che rapresentëia i Länder), rová adalerch por chësta ocajiun.
"Te so pröm discurs da Presidënt dla Republica á Van der Bellen fat tröpes reflesciuns sotes che i capësci avisa. Ares renforza mia convinziun che i podarun ince tl dagní se lascé tla Hofburg sön n interlocutur davert, che mët averda y é sapiënt", dij da Viena Kompatscher. Te n tëmp de mudamënc che porta pro a tëmes, ajuntëia Kompatscher, "vëiga Van der Bellen dantadöt tla crëta l’atejamënt mental che porta pro al renovamënt. So messaje é tler: la crëta mëss dagnora ester majera dl dübe", referësc le Presidënt dla Provinzia, che sotrissëia ciamó dui passaji dl discurs dl Presidënt: chël olache Van der Bellen á recordé che na comunité é avisa tan sterscia che ara é bona da tigní adöm y chël dl apel ai valurs fondamentai de nostes democrazies, dala liberté ala valivanza, dala solidarieté ala dignité dles porsones. "Al é les ermes che la jënt á por podëi desmascheré damí le populism", dij Kompatscher. Da sotrissé é ince la gran importanza che le presidënt nü ti dá ales capazités dla jonëza, por mirit de süa energia, so coraje y süa pasciun.
"I ti aodi al Presidënt nü döt le bun por süa inciaria y aspeti cun plajëi le momënt olache i podará le incunté personalmënter por baié dl svilup de nosta tera. Nosc raport cun i politics austriacs è dagnora sté strënt y d’amizizia, y i sun sigü che al romagnará insciö ince tl dagní", stlüj jö Kompatscher da Viena.
usp
Galaria dales fotografies
