Istitut Ladin Micurá de Rü: la Junta provinziala aprovëia n Statut nü
Les mudaziuns plü importantes é la composiziun nöia dl Consëi d’aministraziun y la fondaziun de na comisciun culturala.
Cun la delibera proponüda dal assessur ladin Florian Mussner á la Junta provinziala aprové incö ai 31 de jená n Statut nü dl Istitut Ladin „Micurá de Rü“. Nezesciar é sté chësc vare en conseguënza de n decret statal che prevëiga le smendrimënt di mëmbri di organs de aministraziun y de control dles corporaziuns publiches cun n numer da trëi a mascimo cin mëmbri. „Le Consëi d’aministraziun sará metü adöm da trëi rapresentanc dl grup linguistich ladin cun n rapresentant dla Provinzia, n ombolt o n assessur de comun y cun n rapresentant dl sistem scolastich ladin“, spliga l’assessur Mussner. Por ci che reverda i Comuns gnarál baraté jö tresfora danter ombolc/assessurs dla Val Badia y de Gherdëna. Na novité é ince che le Consëi d’aministraziun romagn en ciaria por alplü trëi mandac, da süa nominaziun al’aprovaziun dl ultim bilanz de süa inciaria. Aladô dl statut nü é les funziuns prinzipales dl Consëi l’aprovaziun dl program d’ativité anual, dl budget economich y d’investimënt y la definziun dles priorités di proiec. Al lita le presidënt, nominëia la Comisciun culturala y formulëia propostes de mudamënt dl statut.
Na novité é ince la composiziun de na Comisciun culturala nöia, che vëgn nominada dal Consëi d’aministraziun y che ará indöt cinch mëmbri. Cater di cinch mëmbri sará esperc dl setur cultural y scientifich, lapró röia le diretur dl Istitut. La Comisciun culturala é l’organ consultif dl Consëi d’aministraziun por l’ativité scientifica y l’inrescida. Les funziuns prinzipales dla comisciun sará da lauré fora le program cultural y d’inrescida y dé jö arac che le Consëi se damana.
„Implü é le statut nü ince gnü adaté ales normatives nöies che reverda l’armonisaziun dl bilanz y la planificaziun plurianala“, spliga le diretur provisore dl Departimënt Scora y Cultura ladina Felix Ploner, che á surantut dal 1 de jená le Departimënt dal diretur Alexander Prinoth. I proscims vari sará sëgn la proponüda de candidac por le Consëi d’aministraziun che gnará spo nominada dala Junta por podëi scomencé cun süa funziun ofiziala.
„L’Istitut cultural ladin Micurá de Rü é öna dles seves plü importantes por le mantignimënt de nostes rujenedes y de nosta cultura. Al se crüzia dla promoziun dla cultura, dl barat cun les atres ijoles retoromanes, al fej inrescides scientifiches y manajëia na seria de publicaziuns sön tematiches desvalies“, sotlignëia l’assessur Mussner. Implü dá ince l’Istitut na seria de impulsc por le svilup dla cultura y dles rujenedes y al é na fontana preziusa por studënc y esperc, insciö Mussner.
usp
