Dala Junta: les dezijiuns plü importantes
Stipendiums, posć de laur tla sanité, program de manutenziun di frabicac, No Credit 2017 y d’atres dezijiuns importantes dala sentada dla Junta provinziala.
La Junta provinziala á aprové incö n finanziamënt de 383mile euro che vëgn metü a desposiziun por la „Rëi cuntra la dependënza dai jüc“ (Netzwerk Spielsucht), n proiet dl’Aziënda sanitara. „Tres chësta rëi de sostëgn – á sotligné le presidënt Arno Kompatscher – dessel gní metü da jí proiec de scombatimënt cuntra la dependënza dai jüc cun n plann d’intervënt che reverdes ativités terapeutiches, d’informaziun, de sostëgn y de consulënza por i amará y sü familiars.“ L’Astat scri te so arat che tl Südtirol él söporjö dai 4 ai 7mile jogadus che sofrësc de chësta patologia y implü 12mile che á n comportamënt problematich tl vers di jüc. La fascia d’eté plü atocada dala dependënza dai jüc é i jogn dai 21 ai 30 agn, les porsones zënza laur o cun n laur malsigü. La Provinzia de Balsan ciafa atualmënter dal Stat le 1,5 porcënt dl davagn fiscal che vëgn dales mascins da jüc por na soma complessiva de 800 mile euro, soma che vëgn reinvestida te programs de prevenziun y reabilitaziun.
Implü á la Junta provinziala ince dé süa aprovaziun a döes bandides de concurs por indöt 330 stipendiums che vëgn assegná por meric particolars. Vigni stipendium é doté cun 1.160 euro, l’impëgn finanziar dla Provinzia é de indöt 383mile euro. La pröma bandida reverda la conzesciun de 147 stipendiums a studënc che tl ann academich 2015/16 á frecuenté istituziuns universitares o scores profescionales tla Talia y che á ciafé resultac de ezelënza tratan so stüde. Por fá domanda él nezesciar da avëi n valur mesan dla valutaziun de 27/30 y almanco 40 ECTS o n valur final dla laurea de almanco 103/110. Indöt 93 sará i studënc dl’Université de Balsan che ciafará n stipendium, 54 studënc gnará selezioná dales atres strotöres universitares dla Talia aldinfora dl Südtirol. La secunda bandida reverda indere la conzesciun de 183 stipendiums a studënc che á frecuenté n’istituziun universitara o na scora profescionala foradecá cun valutaziuns almanco de 1,5 y cun 40 ECTS o na valutaziun finala de 1,5. Les domandes mëss gní ortiades al Ofize Dërt al Stüde, strada Andreas Hofer 18 a Balsan da aurí inant cina ai 4 de ma dl 2017. Les domandes mëss gní presentades tres le sorvisc de e-government dl’Aministraziun provinziala. Info: tel. 0471 412946/412934, mail dirittoallostudio@provincia.bz.it, web http://www.provincia.bz.it/diritto-allo-studio/
Löm vërda dala Junta provinziala por le program de manutenziun di bëgns imobili dla Provinzia. Al se trata de prësc 600 strotöres sön döt le teritore provinzial che vëgn ejaminades y ressanades alado dl bojëgn: dales scores, ai ofizi publics, dai laboratori ai museums, cina ales üties da munt y les strotöres d’acoliënza. „Por le 2017 gnarál investí 10,5 miliuns de euro tolon en conscidraziun düc i frabicac y dantadöt ince les scores“, á splighé l’assessur por le patrimone Christian Tommasini. Implü á la Junta provinziala ince aprové n adatamënt dla plata organica cun 12 posć de laur nüs a tëmp plëgn tl setur dla sanité. Al se trata de 10 posć nüs por la neuroreabilitaziun y 2 por infermiers por l'assistënza ai muciadus.
N ater punt al ordinn dl de é ince sté incö sön proposta dl assessur Arnold Schuler l’ajornamënt dl regolamënt söl istalaziun y la conduziun de implanc termics. Ajorné él gnü le regolamënt provinziak söl'istalaziun y la conduziun de implanc termics cun les prescriziuns che cina sëgn ê varëntes por i borjadus cun n potënza nominala sura a 35kW y che é sëgn gnüdes mudades aladô dles diretives europeiches. I obietifs dla Junta é na segurëza plü alta, efiziënza energetica y la reduziun dles emisciuns y di cosć por i zitadins. Cun l’ajornamënt él ince gnü elaboré n pice liber de implant che ti somëia a chël statal y che vigni proprietar de borjadus da 10 kW de potënza insö mëss avëi. Le pice liber gnará compilé dai manajadus dl borjadú tratan la pröma manutenziun y ará düc i dac nezesciars che reverda ince les operaziuns de manutenziun ordinara y straordinara. Por plü informaziuns: Ofize Prevenziun medefüch, strada Drusus 116 a Balsan, tel. 0471 416020/21, mail: prevenzione.incendi@provincia.bz.it
Plü controi de velozité y na maiú colaboraziun cun le Trentin. Chisc é i obietifs dla campagna de sensibilisaziun sön la segurëza sön strada No Credit, piada ia tl 2006. Bele rovada ala dodejima ediziun é la campagna de sensibilisaziun No Credit na mosöra costanta de sensibilisaziun por n comportamënt adaté sön strada y á sciöche obietif chël da smendrí i inzidënc. „Öna dles cosses plü importantes sön strada é da rovëne te na manira sigüda y cun prudënza. Dantadöt vél chësc por i motoziclisć, ince deache ti caji de inzidënc é les conseguënzes scialdi plü series por les porsones interessades“, spliga l’assessur por la mobilité Florian Mussner. La Junta provinziala á aprové da jí inant cun la campagna de sensibilisaziun ince por le 2017, cun le focus dantadöt sön n aumënt di controi tratan la sajiun da d’isté cun n monitoraje costant di motoziclisć.
usp
