Dala Junta regionala: mendranzes, prozedöres scemplificades
La Junta regionala á aprové les priorités programatiches nöies tl setur dles mendranzes linguistiches.
La Junta regionala á aprové te süa sentada da incö ai 15 de forá les priorités programatiches nöies por ci che reverda la sconanza dles mendranzes linguistiches regionales. „Öna dles mudaziuns prinzipales é dantadöt les metodes de rendicuntaziun i istituc che se fistidia de tematiches che reverda les mendranzes. Deache al se trata prësc daldöt de ënc che taca adöm pro les Aministraziuns publiches o diretamënter de ënc publics autonoms sará les prozedöres de control plü scëmples“, spliga l’assessur regional por les mendranzes Giuseppe Detomas. Tla deliberaziun él preodü da assegné ai revisurs di cunc di ënc o dles assoziaziuns che ciafa i finanziamënc „n rode che atestëia la coretëza y la conduziun zoruch dla spëisa sostignida cina al finanziamënt y al program preodü“.
Danter i obietifs generai stabilis dala Junta regionala él ince la promoziun y le sostëgn „dla formaziun speziala y dl’archirida che á sciöche obietif la chersciüda y le svilup dla comunité de mendranza“, le stüde y l’archirida storica sön les mendranzes, sciöche ince l’elaboraziun de idees inovatives tl ciamp dles ativités culturales. La Junta á preodü n finanziamënt complessif de 1,9 miliuns de euro che gnará partis sö tigni cunt di resultac dl censimënt dl 2011 mo ince dles esigënzes dles mendranzes plü piceres. A vigni moda gnarál reservé almano le 20 porcënt dles ressurses complessives. Tla deliberaziun él ince gnü confermé che por ci che reverda les spëises de capital (1,1 miliuns) é i fonds resservá dantadöt al proiet de ressanamënt y de recuperada dla Ciasa de la Moniaria a Vich por avëi la strotöra ince a desposiziun por n’adoranza de utilité publica.
usp
