Consulta dla jonëza ladina: OK al plann anual
La Consulta dla jonëza ladina s’á incunté da püch por aprové le plann anual y por traté na seria de chestiuns che reverda i jogn y l’abité tles valades ladines.
Löm vërda da pert dla Consulta dla jonëza ladina te süa sentada a La Ila al plann anual por la promoziun dl sorvisc ai jogn dl grup linguistich ladin por l'ann 2017 che é gnü aprové al'unanimité. Do l'arat positif dla Consulta vëgn sëgn le plann mené inant ala Junta provinziala che mëss ince dé süa aprovaziun. Le presidënt Gottfried Nagler á raporté dl'incuntada albüda a Balsan cun i rapresentanc dles istituziuns dl Jugendring y di Ofizi Jonëza todësch y talian y cun i rapresentanc dla Repartiziun Frabiché abitatif che arjigna ca le dessëgn dla lege nöia sön la promoziun dl frabiché abitatif. Te chëstes ocajiuns de incuntada cun i rapresentanc provinziai ti él ince gnü surandé dala Consulta ladina le documënt de propostes y idees metü adöm tles sëres d'informaziun fates l'ann passé che reverda les esigënzes, les dificoltés y i bojëgns dla jonëza. Les porpostes prevëiga danter l’ater aiüc por la cumpra y la costruziun dles prömes ciases, n’aprovaziun manco restritiva por zones abitatives fora ti zëntri di paisc y la promoziun de formes deslvaies de colaboraziun danter Provinzia y Comuns. Le documënt é gnü injunté. Por socodí ince l'interesc di jogn sön le tema fabriché á la Consulta en mënt da organisé d'aisciöda döes sëres d'informaziun, öna te Gherdëina y öna tla Val Badia dantadöt sön les alisiraziuns por le frabiché y les Ciases Clima A. Pornanche al vëgn publiché i dac dla inrescida (ASTAT) fata ai jogn y ales jones de döta la Provinzia (Jugendstudie 2016), gnarál organisé na sëra de informaziun di dac te trames les valades.
Por ci che reverda les infrastrotöres él gnü tut in consideraziun l'idea de n gran proiet cun le Comun da La Val che vëgn ejaminé dötaurela ciamó adöm ala Provinzia. Por l'ocajiun á le mëmber Felix Nagler rajoné ince dl proiet "Gadersound", che ti é ince gnü presenté ales trëi Consultes, che á albü le rodul de consulënza por dé consëis de mioramënt dl proiet.
usp
