Program dles infrastrotöres: 69 miliuns por mioré les strades
Le program dles infrastrotöres é gnü aprové incö dala Junta provinziala. La priorité é avëi strades sigüdes y da sposté le trafich aldinfora ti zëntri abitá.
Cun le budget a desposiziun vëgnel realisé laurs de costruziun y ressanamënt dles infrastrotöres stradales sön indöt 2826 chilometri de strades statales y provinziales cun 1662 punc y 206 tuní. En chësc ann él gnü aprové 69 miliuns por le 2017 aladô dl program trienal 2016-18 da investí por la Repartiziun Infrastrotöres. „Aladô de nosc moto #coliélesüdtirol vëgnel investí chëstes ressurses finanziares por adaté les strades ales esigënzes atuales che reverda la proteziun dala tomada de peres, le ressanamënt de punc y tuní, l’eliminaziun di punc plü critics y le spostamënt dl trafich fora dai zëntri abitá“, spliga l’assessur por les strades Florian Mussner. Por i intervënc plü gragn vëgnel lauré aladô de na lista plurianuala de priorités, olache al é scrit dant cai che é i laurs da efetué, ciaran da tó en conscidraziun düc i raiuns dla Provinzia, insciö Mussner. Tl plann trienal él insciö inserí indöt 99 proiec, en general á la Junta provinziala aprové les carateristiches tecniches de indöt 164 proiec. „Por realisé düc i 164 proiec adorassun n investimënt de 1,174 miliarg de euro“, insciö l’assessur Mussner.
„Por le 2017 él ince sön le program l’assegnaziun de trëi apalc dër importanc por döta la viabilité dl Südtirol y che reverda la secunda pert dla zirconvalaziun de Maran, l’entrada tla Val Badia y l’azes al zënter de Porsenú“, spliga l’assessur. Implü él sön le program por le 2017 indöt 32 bandides de concurs sön döt le teritore provinzial, tl 2018 gnarál lapró 13 bandides y tl 2019 indöt 18 bandides nöies por realisé operes stradales. Por ci che reverda la Val Badia él sön le program la bandide de concurs por le ressanamënt di mürs de proteziun sön la strada statala 43 tla direziun dl ju de Furcia.
Inant vá insciö i laurs por 36 proiec, danter l’ater por ci che reverda les galaries de proteziun dala tomada de peres a Atzwang, i laurs por le terzo loto tla strada tla Val d’Ega, la sortida da Bornech y la costruziun di tuní nüs tl’Ultental. Implü vëgnél ince scomencé cun i laurs por l’ampliamënt dla strada che porta a Fié y cun la strada por les rodes tla zona de Leifers. Da anoté él ince i 4 miliuns de euro che vëgn metüs chësc ann a desposiziun por i Comuns.
„Sciöche ince tl tëmp passé dess chëstes bandides de concurs ester n impuls ince por l’economia locala“, dij l’assessur competënt. Strades sigüdes y tignides te bunes condiziuns pormët ai zitadins da se sposté te na manira asvelta y é n vantaje nia ma ince por i ghesć y les impreses, mo ince por la mobilité publica sön strada, insciö l’assessur Mussner.
usp
