Laur por la jonëza tl Südtirol, na rëi che fej dër tröp
Le plann anual por la promoziun dl laur por la jonëza é gnü presenté te na conferënza stampa cun i assessurs Mussner y Achammer a Maran.
Le volontariat, les organisaziuns joniles y i sorvisc ai jogn é i pilastri fondamentai por garantí le bun funzionamënt di sorvisc che vëgn pitá dötaurela ales jones y ai jogn dla Provinzia de Balsan. Le prinzip dla sussidiarité á garantí che la cuantité de ofertes por la jonëza vëgn anuzades bun dantadöt ti seturs dla cultura y dl sozial. La Junta provinziala á aprové da püch i planns anuai por la promoziun dl laur por la jonëza por le grup linguistich ladin (280.000 Euro) y por le grup linguistich todësch (6 miliuns de euro). Avisa por ci che chëstes somes vëgn adorades y ci programs che vëgn organisá é gnü presenté ai 28 de forá tl detai dai assessurs Florian Mussner y Philipp Achammer te na conferënza stampa a Maran adöm ai rapresentanc de organsaziuns devalies che laora te chësc ciamp. Insciö ne vëgn la promoziun dl laur por y cun i jogn nia ma sostignida da n finanziamënt costant da pert dla Provinzia, mo ince dal prinzip de sussidiarité che ti dá na man lëdia ai Sorvisc ai Jogn pro sües ativités y programs che é la fondamënta che fej funzioné döt le sistem.
„An vëiga che al vëgn fat tröp“, á sotligné l’assessur Florian Mussner recordan ince la buna colaboraziun danter i grups linguistics por ci che reverda le laur por la jonëza. „I sun te na buna situaziun atulamënter, conscidran che te vigni localité ladina él poscibl da costruí n Zënter por la jonëza, te vigni valada dessel tl dagní ince gní a se le dé n zënter de valada“, dij Mussner. „Important él ince da mantigní la buna colaboraziun cun i raiuns vijins, a Maran por ejëmpl virel atualmënter indöt 195 ladins y ladines“, á recordé l’assessur ajuntan, che le dialogh y na vijiun daverta dl monn dess ester dui pilastri fondamentai por le svilup dla jonëza tl dagní. „L’obietif prinzipal é chël da ti dé ales jones y ai jogn tles mans les competënzes por podëi se möi te na manira autonoma y por se tó sö responsabilité y odëi la vita sciöche na poscibilité da realisé sües vijiuns y aspetatives“, insciö Mussner.
L’assessur Philipp Achammer á recordé che l’Aministraziun provinziala á conzepí n conzet cun tl zënter la sussidiarité, dantadöt por ci che reverda la promoziun dl laur por la jonëza. „Insciö él nosta ghiranza da mët a desposiziun les ressurses por odëi realisé proiec y scomenciadies che i jogn se damana y adora diretamënter söl post“, á splighé Achammer. Chësc ti dá ince la poscibilité ai jogn da svilupé idees y conzec te na manira autonoma. „Cun la promoziun por la jonëza vëgnel renforzé insciö la responsabilité da lauré adöm y da fá comunité“, á recordé Achammer sotlignan l’importanza ince de proiec de partezipaziun y democrazia.
Por l’ann 2017 él gnü aprové tres le plann anual 280.000 euro por la promoziun de ativités y programs por le grup linguistich ladin. Implü él ince gnü preodü na soma de 156.00 euro por le ressanamënt di ofizi dla sënta dl Sorvisc ai Jogn a San Martin ( 115.000 Euro tl 2016 y 40.800 euro tl 2017). Investí el ince gnü 250.000 euro por le Zënter dla Jonëza a La Ila. Le plann anual por la promoziun dl sorvisc ai jogn dl grup linguistich ladin regolamentëia danter l'ater l’ampliamënt y le sostëgn finanziar dles infrastrotöres di jogn, la promoziun dles ativités, di proiec y di programs straordinars a bëgn dla jonëza. Implü se dá le plann ince jö cun le regolamënt sön les inrescides scientifiches, la conzesciun di contribuc promozionai y le program dles ativités di sorvisc ai jogn. Implü él ince preodü n sostëgn por le program dles ativités dla Repartiziun Cultura y Intendënza scolastica ladina che reverda le Sorvisc jogn. N impuls important vëgn ince dala Consulta di Jogn che se dá jö bele da plü tëmp cun la tematica dër atuala dl abité y dl frabiché por i jogn tles valades ladines y te döt Südtirol.
Sciöche rapresentanc dles organisaziuns joniles á tut pert ala conferënza stampa Karlheinz Malojer (suranstant dla comunité de laur di Sorvisc ai Jogn – AGJD), Oliver Schrott (suranstant dl Sorvisc ai Jogn de Maran), Salvatore Cosentino (suranstan di streetworker y dl proiet WORK UP), Karin Husnelder (suranstanta dla rëi di zëntri dla jonëza– NETZ), Sissi Prader (volontara dl Sorvisc ai Jogn de Maran des Jugenddienstes Meran) y Anni Tammerle (suranstanta de WORK UP). I rapresentanc á rajoné dl laur por la jonëza aldedaincö, dantadöt ince dla colaboraziun danter i rapresentanc di sorvisc ai jogn cun l’adoranza de de plü lingac. Important él dantadöt, che i mituns y i jogn impares da surantó responsabilités y compic y i Sorvisc ai Jogn laora cun program ampl por jí adincuntra a renforzé chësc obietif.
Le Laur por y cun la jonëza vëgn garantí te Südtirol en gran pert da na rëi capilara de istituziuns lëdies, da volontars engajá y da profescionisć. Le setur s’á svilupé dër tröp ti ultims 33 agn cun atualmënter n’oferta ampla de organisaziun y strotöres che pita na gran richëza de programs por i jogn da implí le tëmp lëde y da ester de aiüt te situaziuns de dificolté. Na ressura fondamental por chësc setur é i volontars y i rapresentanc di volontars - indöt 83 suranstanc y 415 mëmbri di consëis – por sües bries tratan l'ann y ince ai sura 10 mile jogn, jones y adulc che se dá da fá volontariamënter tles 11 organisaziuns joniles, ti 20 Sorvisc ai Jogn y ti zirca 50 Zëntri por la jonëza te döt Südtirol. Na fontana de competënza importanta é ince zirca 237 colaboradus che laora a tëmp plëgn te chësc setur.
USP
Galaria dales fotografies
