Autonomia: plata internet ince por ladin
Da püch él da ciafé la plata internet dla Provinzia sön l’autonomia ince por Ladin. La traduziun é gnüda fata dal Ofize Chestiuns linguistiches.
Ci é pa l’autonomia? Co funzionëia pa le sistem politich tl Südtirol y sön ci regoles se basëia pa la convivënza pazifica? A chëstes domandes ti dá la plata internet nöia dla Provinzia na resposta jon ite a funz sön düc i aspec che reverda l’Autonomia dla Provinzia de Balsan. La plata internet dla Provinzia dedicada aposta al’Autonomia é da püch ince gnüda traslatada tl ladin por arichí insciö l’oferta linguistica por le grup linguistich ladin. „L’oferta online de plates internet dla Provinzia por ladin é tres en elaboraziun y l’obietif é chël da traslaté le plü che ara vá i contignüs generai ince por ladin, dantadöt por ci che reverda les informaziuns de basa dl sistem politich y dl’autonomia“, spliga l’assessur por la scora y cultura ladina Florian Mussner. N rengraziamënt ti vá por la traduziun ala seziun ladina dl Ofize Chestiuns linguistiches dla Provinzia che s’á crüzié dla traduziun di tesć, insciö Mussner. L’assessuria por l’informatica Waltraud Deeg informëia che atualmënter vëgnel renové 200 plates dl'Aministraziun provinziala. "Ince la traduziun dles plates internet tl ladin é na pert importanta dl proiet de renovamënt, cun en ajunta n azes plü saurí ai sorvisc dl'aministraziun provinziala", insciö l’assessuria Deeg.
La plata internet pita na suraodüda sön les bases iuridiches dl’autonomia, les dates plü importantes dla storia, le dërt d’adoranza dl lingaz dla uma, les istituziuns dl Consëi y dla Junta provinziala sciöche ince l’assegnaziun dles competënzes. „I sperun che l’oferta vëgnes ince anuzada dai zitadins, deache ma sce la rujeneda dla uma vëgn adorada ince por s’informé y se dé jö cun tematiches desvalies él le ladin che mantëgn inant süa vitalité por le dagní“, insciö Mussner. Por plü informaziuns: http://www.provinzia.bz.it/politica-dert-relaziuns-ester/autonomia/default.asp
USP
