Dala Junta: Sorvisc soziai, museums, abitaziuns IPES
Tröpes é stades les dezijiuns dla Junta ai 07 de merz: danter l’ater ti seturs dl’assistënza ai seniors, dles ciases IPES, dl insegnamënt dla religiun yii.
La Junta provinziala á aprové incö ai 7 de merz na seria de propostes che reverda le sorvisc de acompagnamënt y dl’assistënza abitativa por seniors. Atualmënter é les strotöres a desposiziun por chësc sorvisc indöt 9 cun n’assistënza garantida por 93 posć te döt le Südtirol por porsones che ne é nia plü autosufiziëntes da vire a ciasa. Le sorvisc é operatif dal 2014. „Le sorvisc gnará organisé te na manira plü flessibla y al gnará tigní cunt dles esigënzes personales di seniors“, spliga l’assessuria por les politiches soziales Martha Stocker. Preodü él che les formes abitatives vëgnes smendrides da trëi a döes (acompagnamënt y assistënza) che sará ince la basa sön chëra che al gnará calcolé les tarifes che sará coliades ales prestaziuns pitades. „Les tarifes gnará calcolades sön la basa dles esigënzes che gnará ajornandes tresfora conscidran la situaziun reala“, insciö Stocker. Le sorvisc de acompagnamënt y de assistënza abitativa vëgn metü a desposiziun a porsones al intern dl pröm y secundo livel de nia autosufiziënza, cun l’eté plü bassa che vëgn arbassada da 65 a 70 agn sciöche ince tles ciases de palsa.
Implü á la Junta provinziala ince stabilí le numer di apartamënc IPES da assegné dl 2017 en afit por zitadins comunitars, extracomunitars y zënza nazionalité. Chësc ann prevëiga l’IPES da surandé y surandé danü indöt 440 apartamënc IPES; la gran pert de chisc gnará surandada a zitadins comunitars. Sciöche bele preodü ti ultims agn gnarál adoré na calcolaziun dl valur mesan ponderé danter la consistënza di zitadins – comunitars o defora dal’UE – y dla nezescité de abitaziuns sön la basa dles domandes presentades. Aladô de chësta calcolaziun gnarál afité a zitadins nia comunitars indöt 57 abitaziuns IPES (dl 2016 nen él sté 50) y 383 a zitadins comunitars (dl 2016 nen él sté 328). „Al se trata de n segnal de sostëgn important por les families che á fat domanda“, á dit le vizepresidënt dla Junta Christian Tommasini che á presenté la delibera. Por podëi s’anuzé de n afit IPES mëss n zitadin da foradecá ademplí a döes condiziuns: avëi la residënta almanco da cinch agn tl Südtiol y avëi n laur sön le teritore provinzial da almanco trëi agn.
N’atra dezijiun importanta tuta dala Junta provinziala é chëra dl ajornamënt di titui de stüde por ti rové pormez ai posć de maester de religiun. I titui de stüde damaná por avëi azes al insegnamënt de religiun vëgn regolamentá cun decret dl Presidënt dl Junta provinziala en acordanza cun le Vësco dla Diozeja. La delibera aprovada incö dala Junta provinziala sön proposta di assessurs por la formaziun Christian Tommasini, Florian Mussner y Philipp Achammer ajornëia les cualificaziuns profescionales ai planns de stüde nüs dles facoltés teologiches y di ISSR talians. „I insegnac de religiun é öna dles seves de nosta formaziun y ti trasmët a nüsc jogn valurs che é la basa por na convivënza pazifica te nosta sozieté“, sotlignëia l’assessur por la scora ladina Florian Mussner. Implü él ince gnü tigní en conscidraziun les competënzes nöies che ti vëgn damanades al personal d’insegnamënt, dantadöt por ci che reverda le punt de odüda pedagogich-didatich. Tla regolamentaziun nöia vegnel nominé i diploms che vëgn damaná por s’inserí tles gradatöres provinziales por l’assunziun a tëmp determiné y indeterminé por l’insegnamënt de religiun tles scores elementares, mesanes y altes. I insegnanc dles scores mesanes y altes mëss ince fá n practicum anual d’insegnamënt por ciafé l’abilitaziun. Implü regolamentëia ince le decret la valivanza di titui de stüde arjunc foradecá.
Na dezijiun dla Junta é ince stada chëra da alzé la cuantité de ores a desposiziun por le personal de sajun ti Museums provinziai. Aldinfora dl Museum d‘Archeologia y dl Museum Natöra él düc i atri set Museums provinziai (Museum Ladin, Museum Ciacia y Pëscia, Touriseum, Museum Ciastel Tirol, Fortëza Franzensfest, Museum dl Vin, Museum dles Usanzes, Museums dles Mineores) che á ma daurí tratan les sajun da d’isté y d’invern. Le numer dles ores a desposiziun é gnü alzé sön proposta dl assessur por i museums Florian Mussner a indöt 83.200 ores. „Al é gnü lapró 5.980 ores che fej fora trëi posć a tëmp plëgn tl Museum Franzensfest che á debojëgn de personal implü“, spliga l’assessur Mussner. La daurida di museums é preodüda püch dan Pasca.
La Junta provinziala á incö ai 7 de merz ince tut la dezijiun da presenté n apel al Consëi de Stat cuntra la sentënza dl TAR da Balsan che ti á dé rajun ai gesturs de n local de Balsan cuntra le provedimënt dla Provinzia che stabilësc che l’autorisaziun por i salfs da jüch cun aparac Vit (videolottery) foss tomada. La Provinzia é dla minunga che la sentënza dla curt ne sides nia en contrast cun d’atres sentënzes dl TAR y á insciö tut la dezijiun da jí cuntra chësta sentënza dan le Consëi de Stat. La defenüda dla posiziun dla Provinzia é gnüda surandada al’Avocatöra dla Provinzia y al avocat Michele Costa da Roma.
USP
