Kompatscher tl Nepal: cooperaziun nezesciara y efiziënta
Bilanz dl presidënt Kompatscher dla vijita tl Nepal: la cooperaziun danter Nepal y le Südtirol funzionëia bun, é de dorada lungia y porta de bugn resultac.
Al s’é stlüt jö la pröma pert dl iade tl’Asia dl presidënt dla Provinzia Arno Kompatscher por vijité i proiec de cooperaziun al svilup scomenciá dala Provinzia de Balsan: do trëi dis tl Nepal jará sëgn la delegaziun südtiroleja inant tl’India zentrala por incunté la comunité tibetana tl esil. Te n pröm bilanz á le presidënt Kompatscher definí la colaboraziun fondamentala y sostenibla. „I podun ester braui dl livel arjunt da chësc Paisc por ci che reverda le setur dla proteziun zivila arjunt ince cun l’aiüt dl Südtirol. Na cooperaziun che döra tl tëmp y é assolutamënter nezesciara, sciöche baldi ince desmostré dal tremoroz dl 2015.“ La costruziun de n sistem de proteziun zivila é un di proiec prinzipai sostignis tl Paisc dl’Himalaya: le presidënt á ince vijité le cantier dl zënter de proteziun zivil nü cofinanzié dala Provinzia a Kathmandu, al á incunté l’ombolt dla capitala y i operadus de proteziun zivila y le socurs alpin nepalej. „La Provinzia á metü a desposiziun ressurses finanziares, veicui y atrazedöra, mo dantadöt le know-how. Y chësc impëgn de plü agn á dé dër de bugn resultac“, comentëia le presidënt.
Le presidënt dla Provinzia á ince incunté le minister nepalej dl turism Jiwan Bahadur Shahi rajonan ince dles dificoltés da garantí svilup y infrastrotöres por le Nepal, öna dles zones plü püres dl monn: „It is nice to see, but hard to live“ (Al é na zona bela da odëi, mo ria da vire“), á dit le Minister. N cuarto dla popolaziun dl Nepal vir cun manco de 1,25 dolar al de y la mortalité di mituns é dër alta (le 4 porcënt di mituns ne suravir nia le cuinto ann d’eté). Atualmënter sostëgn la Provinzia tl Nepal proiec por la fornidöra de ega da bëre, la realisaziun de classes scolastiches a Tipchock, la restrotoraziun dl raiun olache al é sté le tremoroz, la recostruziun de n ospedal a Dhulikhel, la costruziun de n repart tl ospedal da Kunde y de na ciasa por mituns zënza geniturs a Kumbeshwar. Ti ultims vint agn él gnü finanzié da pert dla Proivnzia indöt 40 proiec tl Nepal por indöt 1,2 miliuns de euro.
Tratan i trëi dis dla vijita tl Nepal é le presidënt Kompatscher gnü acompagné da Reinhold Messner che conësc dër bun le raiun. Kompatscher y Messner á vijité la zona atocada dal tremoroz y l’ospedal a Kunde realisé dala Provinzia y dala Fondaziun Messner.
USP
Galaria dales fotografies
