European Online Job Day, apuntamënt ai 28 de merz
L’obietif dla scomenciadia é da fá da punt danter chi che chir n laur y i daturs de laur tl setur dla hoteleria sön na plataforma digitala.
Adoran le web sciöche post d’incuntada danter domanda y oferta de laur, cun n’atenziun particolara por ci che reverda i operadus dl setur dla hoteleria y dla gastronomia. Chësc é le fin di European Online Job Days che vëgn a se le dé, sciöche ince l'inom dij, ma sön internet. La proscima incuntada virtuala che reverda Südtirol, Tirol, Payern, Salzburg y Vorarlberg sará ai 28 de merz. Düc i daturs de laur interessá podará se registré cina ai 27 de merz sön la plataforma www.europeanjobdays.eu, sit internet dl’EURES. Tratan l’evënt sarál poscibl da avëi contac tres le telefon, chat y live-streaming diretamënter da ciasa o ince dala sënta dl’aziënda.
„Al se trata de na forma nöia y interessanta por mët en contat porsones che chir laur y dites che pita n’ocupaziun – sotlignëia l’assessuria Martha Stocker – zënza desmentié che chësta é ince na proposta por se möi al intern dl’Uniun europeica.“ Le coordinamënt dla scomenciadia é tles mans dl’Agenzia dl Laur dl Payern, mo ince i funzionars dla Repartiziun Laur dla Provinzia sará ala pert cun compic de consulënza y de promoziun dles ofertes y domandes. Söl le sit internet www.europeanjobdays.eu él a desposiziun ince video tutorial che pó gní consultá por plü informaziuns, implü él ince a desposiziun por domandes le colaboradú dla Repartiziun Giorgio Costabiei sot al numer 0474 582363 o ince tres email giorgio.costabiei@provinzia.bz.it.
USP
