Tomada patents: segnalaziun debann tres SMS o email
I portadus dla patent pó damané debann al Minister di trasporc la segnalaziun dla tomanda dl documënt tres SMS o email.
„L’obietif de chësc sorvisc nü é chël da ti jí tres deplü adincuntra ales esigënzes dles zitadines y di zitadins y implü vëgnel ince smendrí la burocrazia“, dij l’assessur provinzial ala mobilité Florian Mussner. Por merit dl sorvisc nü istituí dal Minister di trasporc pó bele sëgn i portadus de na patent adoré debann chësta funziun che comunichëia la tomada dla valüta dl documënt tres n SMS sön fonin o tres e-mail. Implü él ince gnü ativé n sorvisc por ci che reverda la segnalaziun dla revijiun che mëss gní fata di veicui o por controlé le numer di punc sön la patent. Por podëi adoré chësc sorvisc dl Minister di trasporc mëss i interessá se registré sön la plata internetwww.ilportaledellautomobilista.it/web/portale-automobilista/applicazioni o ince www.ilportaledellautomobilista.it/web/portale-automobilista/nuovo-servizio-notifiche-multicanale.
La Repartiziun Mobilité dla Provinzia sotlignëia la buna colaboraziun esistënta da agn cun le Minister di trasporc y prezisëia che por merit de chësta comunicaziun digitala nöia él poscibl da sparagné i cosć coliá ala spediziun dla comuncaziun sön papier. L’introduziun de chësc sorvisc nü, ajuntëia l’assessur Mussner, é gnüda otenüda ince por merit dl sostëgn di parlamentars südtirolej. Le proscim vare prevëiga l’adatamënt dl portal tl Südtirol ales normes d’atuaziun en materia de bilinguism y dl’adoranza di lingac todësch y talian sciöche al vëgn bele a se le é por la patent y por comunicaziuns che reverda le numer di punc dla patent.
USP
