Dala Junta: Sostëgn ai muciadus y ales porsones zënza tët
La Junta á aprové incö diretives nöies por ci che reverda l’assistënza dles porsones zënza ciasa. Frabicat d’acoliënza nü a Auer.
Le fenomen dles porsones zënza ciasa é en mudaziun tresfora ti ultims agn, spliga l’assessuria por les politiches soziales Martha Stocker: „Al é gnü a se le dé esigënzes nöies che nes obliëia da fá na valutaziun nöia di sorvisc y dles mosöres de chësc setur.“ Sön proposta dl’assessuria Stocker á la Junta provinziala aprové incö diretives che müda i intervënc por y cun les porsones zënza ciasa. L’atenziun reverda l’acompagnamënt tl vers de na vita plü autonoma. Les diretives é ponsades por i operadus tl setur y é gnüdes elaborades da n grup d’esperc che rapresentëia de plü istituziuns y assoziaziuns publiches y privates. Atulmënter él tl Südtirol indöt 16 strotöres che pita le sorvisc de acoliënza a porsones zënza ciasa: 11 é a Balsan, 3 a Maran, öna a Porsenú y öna a Bornech. Implü lapró röiel na seria de sorvisc y ofertes sciöche por ejëmpl locai de permanënza, sorvisc de destribuziun, pasć cialc y döt le nezesciar. Implü él la Junta che á aprové la conzesciun por mët a desposiziun n frabicat a Auer por la sistemaziun provisoria de porsones che damanda do asil. La strotöra gnará manajada da Volontarius.
USP
