CAR[D]O: Mostra nöia a Ciastel Tirol, cultura ladina tl zënter
La materialité dl corp uman é tl zënter dla mostra nöia a Ciastel Tirol che é gnüda realisada dai artisć Lois Anvidalfarei, Roberta Dapunt y Gotthard Bonell.
Fá conësce les posiziuns di artisć, cherié sensibilité por l’ert contemporanea y motivé i vijitadus da sé dé jö cun la reflesciun dles operes odüdes: chisc é i fins dla mostra nöia sön Ciastel Tirol dal titul „CAR[D]O“ di artisć Lois Anvidalfarei, Roberta Dapunt y Gotthard Bonell. La mostra, che á tl focus la materialité dl corp y sües interpretaziuns artistiches y leterares, é gnüda daurida incö ai 17 de merz dal assessur por la cultura ladina y i museums Florian Mussner, dala direturia competënta Karin Dalla Torre y dal diretur dl Museum Ciastel Tirol Leo Andergassen. „La comprenjiun danter i grups linguistics vëgn renforzada y trasmetüda te na manira particolara tres la cultura y l’ert. Y porchël él por me na gran ligrëza podëi presenté na mostra a Ciastel Tirol che conscidrëia düc i trëi grups linguistics“, dij l’assessur Mussner. Avëi la poscibilité da presenté ince na pert dla cultura ladina tla cöna dla storia tiroleja, a Ciastel Tirol, é dessigü na gran ocajiun che nes fej gaierc, insciö Mussner. „Ince l’orientamënt dl’esposiziun, da uní i trëi seturs dla scultöra, dl depënje y dla leteratra te öna na mostra é n conzet interessant“, dij Mussner.
La mostra CAR[D]O a Ciastel Tirol sará da odëi sön na spersa de 350 metri cuadrac y cöi adöm les formes dl’ert figurativa y dla leteratöra. Le conzet dla mostra nöia a Ciastel Tirol é ince chël da recuperé la cultura ladina al intern dl Museum storich cultural dla Provinzia da Balsan y da la presenté te n contest tematich predefiní, cun ince la dezijiun di artisć da aprofondí la tematica dla materialité dl corp uman, deache düc trëi é spezialisá tl stüde artistich y letarar dl corp. Le „leitmotiv“ dla mostra sará la parora „Caro“, che vëgn dal latin y che ó dí cern mo ince „Cardo“, ci che ó dí poresc dl üsc y ince argomënt. Al se trata insciö de na reflesciun figurativa y linguistica söl corp y sön la porsona.
La scrituria ladina Roberta Dapunt presentëia y lii sües rimes, Lois Anvidalfarei presentará scultöres y Gotthard Bonell sü chedri y dessëgns. Roberta Dapunt á bele publiché de plü libri de poesies, i ultimi de chisc dal titul „La terra piú del paradiso“ (2008) y „Le beatitudini della malattia“ (2013). Lois Anvidalfarei é un di scolturs de ert contemporanea plü conesciüs y aprijá. Döta la opera dl scoltur dla Val Badia é dedicada ales rapresentaziuns dl corp. Gotthard Bonell indere é conscidré n maester dla „realté“ y dla „Neue Sachlichkeit“. Sü stüdi á le focus dantadöt sön l’aspet dl corp uman dan y do la decomposiziun. La mostra é gnüda conzepida insciö dai artisć instësc, la realisaziun grafica é stada tles manes de Uli Prugger (Gruppe Gut, Balsan).
La mostra é daverta dai 18 de merz cina ai 04 de jügn vigni de dales 10.00 ales 17.00. Le de de palsa é le lönesc. Por plü informaziuns: www.schlosstirol.it
USP
Galaria dales fotografies
