Euregio: jí sö por munt cun plü sigurté y informaziun
Pröm vare a Desproch por n boletin dles lovines unich por döt le teritore dl Euregio Tirol-Trentin-Südtirol.
Le pröm boletin dles lovines te plü lingac y varënt por döt le teritore dl Euregio dess ester desponibl, ince sce ma te na forma provisora, tla sajiun da d’invern 2017/18. Al é le pröm vare concret dl proiet transfrontalier „ALBINA“, a chël che al laora para i Sorvisc dla prevenziun lovines dles Provinzies de Balsan, Trënt y dl Land Tirol. Le proiet vëgn manajé dal Ofize dl’Euregio. Cina tl 2019 dess spo chësta scomenciadia gní perfezionada cun l’ativaziun de düc i sorvisc. L’investimënt é de zirca 915mile euro, de chisc él zirca 676mile Euro che vëgn dal'Uniun europeica tl contest dl program Interreg.
Le pröm vare sará l’analisa di sistems che é atualmënter en funziun por podëi svilupé n profil tecnich unich por le boletin dles lovines nü, n aspet fondamental sará ince la realisaziun de na grafica nöia. Le scomenciamënt dl proiet é gnü a se le dé chisc dis a Desproch en presënza dl presidënt dl Land Tirol, Günther Platter, y di responsabls di trëi Sorvisc por la prevenziun dles lovines. N boletin deboriada, á dit Platter, é n valur ajuntif important por la popolaziun residënta y por düc i apascioná dl sport che vëgn a fá vacanza te nüsc raiuns d'invern. Na presënza tres plü alta de porsones sö por munt porta para a de plü situaziuns de pericul, ince deache gonot ne vëgnel nia consulté les previjiuns meteo, la situaziun dla nëi y le pericul de lovines. Cun n boletin unich sperunse de podëi smendrí les situaziuns de prigo y da aumenté de conseguënza la sigurté, insciö Platter.
USP
