Acurdanza Provinzia-Posta, gran travert per l'autonomia
Zënter de destribuzion nuef a Bulsan, mantenimënt de duc i ufizies, plu stieres, cunseniazion dla posta 6 dis sun 7. Sotscrita l’acurdanza cun la Posta.
"Mo n di mpurtant per l'autonomia dl Südtirol che à arjont n travert nuef: garantion n servisc de posta de cualità, segur y inuvatif per i zitadins y la mprejes, miuran la cumpetitività dl teritore". Cun chësta paroles à Arno Kompatscher cumentà la sotscrizion dl’acurdanuza cun la Posta: l cunsëns ie unì sotscrit ncuei danmesdì (5 d’auril) tl ufize de Roma dla Provinzia de Bulsan dal Presidënt Kompatscher y dal Aministradëur delegà dla Postes talianes, Francesco Caio. "Ncuei", à sotrissà l Landeshauptmann, "stlujons ju cun sodesfazion na tratativa longia y carateriseda da na culaburazion positiva cun la Poste Italiane y l Ministere dl’economia y dla finanzes. N basa al’acurdanza de Milan porta la Provinzia pro ala arjonta di obietifs de ressanamënt dl debit publich naziunel sëurantulan na lingia de cëries che garantirà n miëur servisc sun l teritore dl Südtirol".
"Chësta acurdanza" dij Francesco Caio "ie pert dl percurs de dialogh cun i teritoresc y la cumenanzes bele nvià via dala Posta per ti jì ancontra ai bujëns nueves y acumpanië l paesc de viers dl’economia digitela y de na majera cumpetitività. La seguranza dla universalità dl servisc de posta y la sustenibltà dla mpreja vën renfurzedes tres chësta acurdanzes che valorisea i elemënc carateristics de capilarità y daujinanza dla Posta y si funzion d’azienda soziela y de marcià". Cuncretamënter, per cie che reverda la destribuzion dla posta, ie la zifra metuda a despusizion dal bilanz provinziel de 3,2 milions de euro, mesuns che unirà trac ju dal bilanz dl Stat tres la pruzedura preududa dal’Acurdanza de Milan. A chisc iel da njunté mo 6,8 milions tla forma de servijes sëuraprò, danter chisc la regiaurida dl zënter de cerduda y destribuzion de Bulsan y d’autra scumenciadives cun n sgors sterch de viers dla modernisazion, per de ndut 10 milions de euro.
"L resultat plu mpurtant" – à auzà ora Kompatscher – "ie che a chësta maniera ons la garanzia che degun ufize dla posta dl Südtirol unirà śarà, y che la ocupazion te chësc ciamp ne sarà nia mé nia ala zibla ma la puderà nce se nuzé de na sburdla de viers de n svilup: a Bulsan, defati, uniral realisà l zënter de cerduda y de destribuzion che elaburerà duta la posta locala che univa nchina ncuei elabureda a Verona. L’acurdanza che on sotscrit nes dajera oradechël la puscibltà de cunsenië i prodoc de editoria 6 dis al’ena". Chësta urganisazion nueva dl servisc tl Südtirol unirà coordineda da n respunsabl local per seguré che l ti vënie dat plu arta a bujënsy esigënzes particuleres dl raion, ntan che l monitoraje dl’atuazion cuncreta dl’acurdanza unirà dejëut da na cumiscion paritetica Provinzia – Poste Italiane metuda adum da 6 persones.
Tres l'acurdanza sotscrita a Roma ne saral nia mé puscibl realisé l zënter de cerduda y destribuzion provinziel y garantì l mantenimënt di 129 ufizies dla posta che ti dà da lëur a 370 mplieghei y 503 postins ma l ti unirà nce giaurì la streda al’arjonta dl bilinguism y dl proporz aldò dla normes n forza. Danter i servijes de njonta udui danora dal’acurdanza luna nce ora chël che ti dajerà la puscibltà ai postins de se nuzé de strumënc digitei moderns, tres chëi che la pruzedures puderà deventé scialdi plu asveltes y scëmples a vantaje dl slune y dl’azessibltà dl servisc da pert di zitadins. A Bulsan y Maran, uniral, per finé via, giaurì doi lueges, ulache n puderà jì a se tò i pachetli cumprei tres l online shopping y l e-commerce.
Video Ufize Roma dla Provinzia
Video firma acurdanza Provinzia-Posta
Audiointervista Kompatscher y Caio
USP
Galaria dales fotografies
