Logo unitar trilingual por la Provinzia de Balsan
La Junta provinziala s'á metü a öna sön l'identité visuala dla Provinzia tla corespondënza y tla comunicaziun por ci che reverda le logo dla Provinzia.
Unitar y tla verjiun por todësch - talian - ladin: cun chësta identité visuala nöia dessel gní adoré tl dagní le logo dla Provinzia de Balsan-Südtirol. Sön chësc s'á la Junta provinziala metü a öna ai 27 de merz sön proposta dl assessur ladin Florian Mussner. "N logo olache al é tres dötes trëi les rujenedes ofiziales dla Provinzia á n carater simbolich sterch, deache al respidlëia le Südtirol sciöche provinzia cun trëi rujenedes ofiziales, olache la varieté culturala y linguistica vëgn sostignida y ghirada", dij Mussner. "N logo provinzial por todësch, talian y ladin á n gran valur d'identificaziun por düc i trëi grups linguistics y sotrissëia ince le fat che la convivënza tl Südtirol funzionëia por mirit dl'autonomia y che nos respetun nostes tradiziuns ince canche i adorun i simbols ofizialmënter" alza fora l'assessur ladin.
Les diretives atuales por ci che reverda le Corporate Design dl'Aministraziun provinziala sön le logo provinzial dij che sön le logo dessel gní dant le blasun dla Provinzia autonoma de Balsan y la denominaziun te dui o te trëi lingac „Autonome Provinz Bozen – Südtirol“, "Provincia autonoma di Bolzano – Alto Adige", "Provinzia autonoma de Bulsan– Südtirol". Le blasun y la denominaziun te dui lingac é n'unité. I departimënc y i sorvisc ladins adora bele la varianta dl blasun cun la denominaziun te trëi rujenedes. Sëgn dessel gní adoré vare por vare la varianta unitara por döta la corespondënza y la comunicaziun dla Provinzia. Por chësc fin arjigna ca l'Ofize Organisaziun dla Provinzia na zircolara.
USP
