Equal Pay Day: avalianza de davagn tl zënter
Rodi de jëne y conseguënzes sön la formaziun, la dezijiun profescionala y le davagn é tl zënter dl’ediziun 2017 dl De por l’avalianza de davagn.
La Comisciun provinziala por l’avalianza dles oportunités por les ëres y le Sorvisc Ëres sará presëntes adöm a d’atres 62 organisaziuns por l’ Equal Pay Day ai 21 d’auri sön döt le teritore provinzial cun indöt 28 postaziuns por sensibilisé sön la chestiun dl’avalianza de davagn danter ëres y ëi. L’obietif prinzipal é chël da sensibilisé por smendrí la desvalianza danter le davagn di ëi y dles ëres. Aladô di dac dl Istitut provinzial de Statistica, ASTAT, ciafa les ëres cina 17 por cënt demanco de davagn por le medemo laur y cun medemes cualificaziuns. Chësta desfarënzia é dër grana, aladô di dac ASTAT, tl setur dles assiguraziuns y dla finanza. Aladô dl stüde fat dl Istitut por la promoziun di lauranc AFI-IPL é le davagn mesan anual por i ëi de 26.360 euro, por les ëres de 17.814 euro. Chësc porta ince para conseguënzes pro la ponsiun, olache les desfarënzies vëgn ince ala löm.
N’atra tematica zentrala dl Equal Pay Day é ince la dezijiun söl percurs profescional, che gonot vëgn determinada ince dala spartiziun di rodi feminil y maschil dala infanzia insö. Insciö él ma na picera pert de ëres che tól la dezijiun da lauré tl setur dl frabiché, dla mecanica y te atri seturs tecnics y scientifics, y dal’atra pert él na prozentuala plü alta de ëres che laora tl setur dla pedagogia, dles sciënzes soziales y umanistiches. L’Equal Pay Day dess insciö ester ince n’ocajiun por ponsé sura sön chëstes desfarënzies y sön co les smendrí.
„Dal pröm Equal Pay Day che é gnü organisé dan da ot agn ne se á desfarënzia de 17 porcënt danter le davagn di ëi en confrunt cun chël dles ëres nia mudé cotan, mo plütost ma püch“, á dit la presidënta dl Consëi provinzial por l’avalianza Ulrike Oberhammer. Ëres davagna demanco co i ëi fajon le medemo laur, insciö Oberhammer, por ejëmpl davagna avocac dui cina trëi iadi tan tröp co avocadësses. Por la vizepresidënta Franca Toffol él porchël fondamental da avalié i davagns ince por revaluté i laurs feminins: „Important él te chësc vers da lauré bele tratan la formaziun dla jonëza por mët les bases bele dailó.“
Na scomenciadia che vëgn ince organisada tl contest dl Equal Pay Day é le Ironman Contest, olache i ëi vëgn motivá da daidé deplü tl laur da ciasa. Ince chësc ann sarál indô personalités dl monn dla politica (Manfred Schullian), dl’economia (Thomas Mathá) y dl sport (Tommaso Traversa y Christian Pigneter) ala pert, por le pröm iade ince personalités dal monn dla dlijia (Toni Fiung). La competiziun sará ai 21 d’aurí dales 12.00 inant sön la plaza Muster a Balsan.
La tematica rodi de jëne y conseguënzes sön la formaziun, la dezijiun profescionala y le davagn é ince la chestiun zentrala dl’ediziun nöia dla revista „Ëres“.
USP
Galaria dales fotografies
