Stocker: pröm aiüt, n plann cun mosöres cina la fin de ma
L’assessuria Stocker á inciarié l’Aziënda sanitara da elaboré cina le mëis de ma n plann cun mosöres de reorganisaziun dles strotöres de pröm aiüt.
La segurëza di zitadins da gní socodis tl caje de nezescité te na manira adatada tles strotöres de pröm aiüt é aladô dl’assessuria provinziala Martha Stocker n compit fondamental dl’Aziënda sanitara provinziala. Chësc setur gnará sëgn ince ejaminé tl contest dla reorgansaziun dles strotöres de pröm aiüt te düc i ospedai dla Provinzia. Por l’assessuria Stocker él tler cai che sará i vari che messará gní fac por rové a na soluziun abonora dles problematiches che reverda le setur de pröm aiüt dl Südtirol. „Cina la fin de ma messará n grup de laur elaboré na proposta concreta por definí na prozedöra unica da adoré sön döt le raiun provinzial te düc i ospedai. Le grup de laur sará sot ala direziun dl’Aziënda sanitara provinziala adöm cun i primars de dötes les strotöres provinziales di reparc de pröm aiüt y di direturs di raiuns competënc por l’organisaziun di ospedai“, á splighé l’assessuria Stocker do n’incuntada cun i repsonsabls dl’Aziënda sanitara provinziala.
Le fin dl grup de laur sará chël da ciafé na soluziun ai problems strotorai y de personal, m ince da regolamenté l’azes al pröm aiüt. „Te chësc contest gnarál ince ejaminé les conseguënzes che le tratamënt de caji de degöna emerënza á por i caji che mëss veramënter gní socodis atira“, spliga l’assessuria. L’obietif de chësta ejaminaziun é da ciafé soluziuns ales situaziuns de dificolté che é gnüdes registrades te n valgügn reparc de pröm aiüt dla Provinzia cun vantaji sides por i paziënc co ince le personal. Na chestiun importanta te chësc vers sará ince le mioramënt dl’assistënza primara söl teritore en colaboraziun cun i doturs de medejina generala, di raiuns sanitars y dles farmazies cun le focus ince sön campagnes d’informaziuns por informé i zitadins dles prestaziuns sanitares a desposiziun tles vijinanzes zënza messëi jí al pröm aiüt.
USP
