Kompatscher ala Conferënza di suranstanc austriacs a Alpach
Dodoman, vëndres ai 12 de ma, tolará ince le presidënt dla Provinzia Arno Kompatscher pert ala Conferënza di governadus di Länder austriacs a Alpach a Tirol.
Ince le presidënt Arno Kompatscher sará presënt ala Conferënza di suranstanc di Länder austriacs (Landeshaputleutekonferenz) en vëndres ai 12 de ma a Alpach tl Tirol. Ala incuntada él ince preodü la presënza dl pröm minister austriach Christian Kern y de sü vize Reinhold Mitterlehner. La Conferënza di suranstanc di Länder, che de norma vëgn organisada un o dui iadi al ann, é l’incuntada informala plü importanta por promöie la colaboraziun danter les Regiuns y le Stat austriach.
Kompatscher tol pert ala incuntada a Alpach sön invit dl Landeshauptmann tirolej Günther Platter che á ince atualmënter la presidënza dla Conferënza. L’apuntamënt se deura indoman cun na zerimonia en onur di suranstanc da denant dla Provinzia Niederösterreich, Erwin Pröll, y dla Provinzia Oberösterreich, Josef Pühringer, che á lascé da püch sües inciaries ofiziales.
Le scomenciamënt di laurs dla Conferënza di suranstanc é preodüs por vëndres tl Congress Zentrum, danter i punc sön l’ordin dl de él ince tematiches atuales che reverda düc i Länder. Le presidënt Kompatscher portará dant le punt d’odüda dla Provinzia y rajonará ince dla situaziun politica economica atuala dl Südtirol. Do l’incuntada gnarál organisé na conferënza stampa dales 12:30 (por tó pert él nezesciar da se acredité: pr@tirol.gv.at)
USP
