Festa dla uma, Deeg y Stocker: reconësce le laur dles umes
L’impëgn dles umes por la familia y por la sozieté dess gní reconesciü, dij les assessuries Deeg y Stocker. Intratan romagn le Südtirol "mother friendly".
Tla relaziun anuala sön la condiziun dles umes tla Ttalia, publiché inier da Save the Children, é ince chësc ann le Trentin-Südtirol indô la regiun "mother friendly" d’ezelënza, spo vëgnel la Val d’Aosta y l’Emilia-Romagna. I indicadus é dantadöt la cura, le laur y i sorvisc por l’infanzia. "Na valutaziun importanta che confermëia che la Provinzia de Balsan é sön le dër tru, cherian dötes les condiziuns politiches por l’atuaziun de intervënc da faziun", comentëia le presidënt dla Provinzia Arno Kompatscher.
En ocajiun dla Festa dla uma recorda l’assessuria por la familia Waltraud Deeg che la familia é la plü picera istituziun y chëra plü importanta tla sozieté. "Y tl zënter dla familia él la uma. Al é tres les umes che gestësc y mëna inant l’impresa familiara cun le cör y le sëns de responsabilité. Ester na uma é n laur de 24 ores, n rode che ne vëgn mai aprijé assá". Por chësta rajun dij Deeg, "messunse sostigní les ëres te so laur por la familia y ti dí dilan vigni de ia por l’ann." Tl cheder de sües competënzes y poscibilités se proa la politica por la familia da sostigní modí desvalis chiris fora dales umes te sü aspec desvalis. L’assessuria Martha Stocker (competënta por le laur, la sanité y les politiches soziales) sotrissëia l’importanza dla promoziun y dl sostëgn dles umes por n tëmp lunch. "La uma se dá jö cun i mituns y l’assistënza de familiars atempá, ara é la manager sanitara de döta la familia, tl volontariat mëteres tl zënter tröpes tematiches soziales y contribuësc cun süa profesciun al davagn familiar. Pochël él dër important da sostigní l’intermediaziun danter familia y laur."
Les assessuries recorda n valgönes mosöres concretes por les umes y les families: sostëgn tla previdënza por la ponsiun (ala fin dl 2016 á la Regiun alzé da 7mile cina a 9mile euro le contribut regional por l'assiguraziun volontara tratan le tëmp che an socodësc i mituns), renforzamënt dl’oferta d’assistënza d’isté (dl 2016 á la Provinzia paié ma por l’assistënza d’isté y extrascolastica 5,9 miliuns de euro y finanzié 260 proiec por 50mila jogn danter i 3 y i 15 agn), zertificaziun audit familiaylaur (impëgn de Agenzia por la familia y Ciamena de Comerz por invié les impreses a mëte a jí mosöres a bëgn dla familia, cina sëgn á 50 aziëndes stlüt jö cun suzes l’audit, sëgn scemplifiché por ti alisiré le percurs ales impreses cina 15 dependënc/dependëntes).
Zënza desmentié l’acompagnamënt y la consulënza dles families: dl 2017, recorda Stocker, él gnü aprové n finanziamënt implü de 300mile euro por i Consultori dl Südtirol, por ti sté ciamó plü dlungia ales families y les daidé tles chestiun liades al’educaziun y ai raporc. "Al é important da fá val’ damperfora y antergní le manco burocratich che ara vá. I mëssun düc deboriada s’impegné por le bëgn dla familia, ajache al ó dí che ince la sozieté funzionëia", stlüj jö l’assessuria.
USP
