Kompatscher ala Conferënza di Suranstanc austriacs a Alpach
Svilup dl’autonomia y dl’Euregio tl zënter dl intervënt dl presidënt Arno Kompatscher a Alpach tl Tirol ala Conferënza di Suranstanc austriacs.
Le presidënt Arno Kompatscher á tut pert inier y incö a Alpach tl Tirol ala Conferënza di Suranstanc (Landeshauptleutekonferenz) di Länder dl’Austria, l’incuntada informala plü importanta por promöie la colaboraziun federala danter les Regiuns. Al é stada la pröma partezipaziun ofiziala dla Provinzia de Balsan. “Propi te na perioda storica, te chëra che le prozes d’unificaziun europeica y le superamënt di confins statai vëgn metüs en disciusciun é l’invit da tó pert ala Conferënza dles Regiuns n segnal sterch y important”, sotlignëia le presidënt Kompatscher. Cun la crisa dl govern de Viena che fajo da cornisc dles debatüdes, él gnü rajoné danter l’ater dl svilup economich, dles reformes, dl renforzamënt dles sperses rurales y dla segurëza.
Kompatscher á informé sü colegs austriacs dla situaziun atuala dl’autonomia südtiroleja y di laurs dla Convenziun, dla cooperaziun transfrontaliera tl’Euregio Tirol-Südtirol-Trentin y dla situaziun sozioeconomica locala. Ince le suranstant tirolej Platter á sotligné la buna colaboraziun tl’Euregio recordan ince ejëmpli ti seturs dla mobilité, université y archirida. Tla cornisc dl aniversar di 25 agn dala contlujiun ofiziala dl stritoz Austria-Talia él la partezipaziun dl presidënt dla Provinzia de Balsan ala Conferënza di governadus austriacs che á ciamó plü importanza. Incö él ince gnü sotligné a Alpach che la contlujiun ofiziala dl stritoz dan l’ONU tl ann 1992 é na pera miliara “nia ma por l’entrada dl’Austria tl UE mo ince sciöche vare important tl vers de na reconziliaziun y dantadöt sciöche basa por na colaboraziun ezelënta sura i confins fora che á ciafé süa forma concreta tl’Euregio.” Tratan la Conferënza á ince fat sü intervënc le minister austriach dl intern Wolfgang Sobotka y chël dl ambiënt y dl’agricoltöra Andrä Rupprechter.
USP
Galaria dales fotografies
