Descurí le Ju dl Sela zënza trafich: vigni mercui de messé y agost
#DOLOMITESVIVES – cun chësta filosofia sará le Ju dl Sela davert por nü dis da d’isté ma por veicui zënza emisciuns.
Cun döes parores che vëgn dal ladin, Dolomites y vives, él gnü cherié le slogan che fajará da cornisc por le scomenciamënt de n percurs nü por le Ju dl Sela dai 5 de messe inant. Les aziuns de #DOLOMITESVIVES é gnüdes presentades incö ai 15 de ma a Balsan. Indöt nü iadi, vigni mercui dales 09.00 ales 16.00, sará le Ju dl Sela saré por düc i veicui che consumëia ciarburant. Sön la strada podaral ma zircolé veicui eletrics, rodes y pedus sciöche ince les corieres dl trasport publich y i camions che mëss porté demez materiai dala cava.
“Cun chësta mosöra sarál poscibl da smendrí les emisciuns de CO2 y da contribuí te na manira importanta al mantignimënt de nosta contrada sensibla dles Dolomites patrimone UNESCO, por chël che i un na gran responsabilité”, á sotligné l’assessur por l’ambiënt Richard Theiner. Sön i Jus dles Dolomites zircolëia mesamënter 1,2 miliuns de veicui. Naturalmënter ne é chësta mosöra nia assá y al sará debojëgn de mosöres ajuntives, mo ara é n segnal, insciö Theiner. „Important él ince che le proiet vëgnes acompagné da n monitoring, insciö sarál poscibl da fá n’evaluaziun ala fin dl isté y da planifiché i proscims vari sön la basa de dac concrec”, spliga l’assessur por l’ambiënt.
“I sun gaierc de chësta scomenciadia, che á sües fondamëntes sön n stüde de fatibilité, na lege aposta y che é früt dla colaboraziun danter les döes Provinzies, de plü Comuns y na seria de organisadus tl setur dl turism”, spliga l’assessur trentin Mauro Gilmozzi. “La Provinzia de Trënt á metü a jí na seria de scomenciadies che reverda la mobilité sostenibla söi jus, dantadöt ince tl setur dl trasport publich”, á dit Gilmozzi.
Por le Ju dl Sela él insciö gnü cherié n pachet de aziuns sot al moto #DOLOMITESVIVES. Por ci che reverda i vari concrec él l’assessur por la mobilité Florian Mussner che á cunté sö por ejëmpl l’ampliamënt di coliamënc dles corieres söi Jus dles Dolomites. Döes linies de corieres sará atives aposta i mercui de #DolomitesVives, öna da Plan de Gralba cina sön le Ju dl Sela (vigni 15 menüc) y öna da Corvara söl Ju dl Sela (vigni ora) ince cina tla Val de Fascia. Implü gnarál ince a se le dé mioramënc por ci che reverda la segurëza stradala. Insciö gnará la plaza da parchené sön Plan de Gralba ampliada por pormët ales corieres da se oje y implü gnarál realisé na plaza por oje i veicui ince al’incrujada Miramonti. Implü él gnü inserí tl plann urbanistich comunal n proiet de realisaziun de na plaza por les corieres söl Ju dl Sela. “Le fin é chël da amplié nosc conzet dinamich de mobilité cun de plü corieres zënza emisciuns, veicui eletrics, mo ince tres les furnadoies”, spliga Mussner.
“La pröma tapa de chësc conzet dinamich cun ince na cornisc de acompagnamënt sará ai 5 de messé”, á dit Marco Pappalardo, le suranstant da denant dla Repartiziun Communicaziun dla IDM. “Cun scomenciadies che reverda la gastronomia, la musiga y les stories culturales dles Dolomites sarál poscibl por düc y dötes da descurí les Dolomites te na manira speziala, cun l’organisaziun che gnará surantuta dales assoziaziuns turistiches de Gherdëna, Alta Badia y dla Val de Fascia. Insciö gnarál a se le dé na “taste tour” de spëises locales arjignades ca da coghi ezelënc te sis üties da munt (Alta Badia) sciöche ince escursciuns y incuntades cun personalités dl raiun dles Dolomites (Gherdëna) y conzerc cun musicontri locai (Val de Fascia). Vigni aziun tematica gnará organisada trëi iadi. Implü gnarál istituí n laboratorium dla fondaziun UNESCO Dolomites y dl Museum Muse (Rorëi) sön la storia y les carateristiches dles Dolomites.
Theiner, Mussner y Gilmozzi ti á spo dit dilan ai ombolc di Comuns interessá, ala Repartiziun COmunicaziun dla IDM, ales assoziaziuns turistiches, economiches y ambientales por avëi svilupé deboriada le conzet de #DOLOMITESVIVES. De plü informaziuns gnará publicades sön na plata internet aposta.
https://we.tl/rjGDiaWiSh
Imajes #DOLOMITESVIVES
https://we.tl/j3ESCyPJD8
Intervista assessur Mussner por ladin
https://we.tl/0tEWgrd5w6
Audio
USP
Galaria dales fotografies
