Dala Junta: les dezijiuns prinzipales de ai 16 de ma
Sostëgn finanziar do le tremoroz tles Marche, pest por la mobilité sostenibla, löm vërda a trëi proiec scientifics y mudaziuns ala DURP: les dezijiuns dla Junta
La Provinzia de Balsan vá inant cun le sostëgn ala recostruziun do le tremoroz dl mëis de agost tl zënter dla Talia. Incö, ai 16 de ma dl 2017, á la Junta provinziala aprové süa partezipaziun finanziara ala realisaziun de n studentat por l’Université de Camerino, tla Provinzia de Macerata. Le proiet gnará realisé adöm al’Euregio Südtirol – Tirol – Trentin. “Chësc ne é nia ma n intervënt che ti vá adincuntra ai jogn mo a döta la popolaziun, conscidran che l’Université é öna dles fondamëntes por döta l’area a Camerino”, á splighé le presidënt Arno Kompatscher.
L’opera prevëiga la costruziun de 20 strotöres de lëgn cun indöt 80 apartamënc. Al sará indöt 457 posć da dormí, de chisc sará 23 posć assegná a porsones cun handicap. “Al se trata de costruziuns antisismiches che dorará tl tëmp y i ciararun da rové i laurs bele pro da d’altonn por ti garantí ai studënc le dërt fondamental da studié”, á recordé Kompatscher. Le cost complessif é de zirca 9,4 miliuns de euro. I cosć sará despartis sö al intern dl’Euregio cun les Provinzies de Balsan y Trënt che paia 4,5 miliuns de euro porom. Le Land Tirol metará a desposiziun 333mile euro por la realisaziun dl'opera.
Implü á la Junta provinziala aprové incö ai 16 de ma sön proposta dl assessur por la mobilité Florian Mussner l’istituziun de n pest spezifich por la mobilité sostenibla tl Südtirol. “Cun chësc pest él nosc obietif da sostigní ciamó deplü les formes alternatives dla mobilté y da sensibilisé i zitadins por ci che reverda i vantaji dla mobilité zënza emisciuns che incuinëia”, á splighé l’assessur Mussner. Le pest nü ará na dotaziun de 10mile euro y é öna dles mosöres contignüdes tl pachet #viajésmart che é le resultat dla colaboraziun danter i Departimënc Economia, Ambiënt y energia, Mobilité y strades dla Provinzia. Al podará gní presenté proiec da ënc publics, assoziaziuns, organsiaziuns y impreses. Na comisciun sará sëgn al laur por definí i criters y les tomades di termins por presenté les domandes.
N’atra dezijiun dla Junta te süa sentada incö é stada l’aprovaziun dla soma de 873mile euro por trëi proiec d’inrescida scientifica. Chisc trëi proiec é gnüs presentá dal’Université Lëdia de Balsan, dal’EURAC Research y dal’Université de Desproch y reverda la sostenibilité ambientala y la gestiun dl teritore da munt. Tres le proiet "Methane emissions from lakes in the Alpine region" gnarál fat analises dles emisciuns de metan de plü lec dl Südtirol, Trentin y Tirol. Le proiet “EroDyn” monitorëia le fenomen dles roes y dles smöies ti terac da munt cun l’obietif da svilupé propostes por la gestiun sostenibla dl fenomen. Le proiet "Generation F³ - Fit for Future" reverda indere de plü prozesc d’inrescida por aumenté les conescënzes di studënc y dles generaziuns che vëgn docá por ci che reverda i mudamënc dl’clima. Cun le finanziamënt de chisc trëi proiec ajuntifs, recorda le presidënt Kompatscher, él la Provinzia che finanaziëia cun la terza bandida de concurs indöt 22 proiec por na soma complessiva de 5,2 miliuns de euro (tl mëteman ê la soma preodüda de 2,8 miliuns).
En ajunta á le Govern provinzial aprové na seria de mudaziuns dl regolamënt söl relevamënt unifiché dl davagn y patrimone (DURP), sön chëres che le Consëi di Comuns á bele dé damperfora so arat positif. Les mudaziuns sará varëntes dala relevaziun di davagns dl 2016, che plüssigü piará ia dai 6 de jügn inant. Danter les novités plü importantes él l’adatamënt dl limo de relevaziun fissé a na cuota de 5mile euro, la valutaziun dla proprieté “desnüda”, la mosöra nöia de calcolé l'avëi söl cunt bancar y i sparagns aladô de n valur mesan anual y la valutaziun nöia dl patrimone che é plü alt co le limo dla cuota lëdia (“Freibetrag”). Les mudaziuns al regolamënt dla DURP definësc y scemplichëia ince le conzet dla pröma ciasa che gnará conscidrada da sëgn inant sciöche n frabicat abitatif cun döes perts coliades (por ejëmpl na cianoa o na garasc) cina a n valur complessif IMI (cuta comunala söi frabicac) de 150 mile euro por grup familiar. Cina sëgn gnôl conscidré ma öna na pert coliada. Implü á la Junta provinziala ince aprové le dessëgn de lege söla strotöra de direziun dla Provinzia y sön la regolamentaziun dles indenités di suranstanc provinziai.
USP
