Dala Jonta: la cuntratazion per l personal dla scolines pò pië via
La Jonta à numinà ncuei la delegazion publica per nvië via la tratatives sun l renuvamënt dl cuntrat cumpartimentel per l personal dla scolina.
Sun pruposta dl’assessëura per l personal Waltraud Deeg à la Jonta provinziela ncuei numinà la delegazion publica crian la fundamëntes per nvië via cuncretamënter la cuntratazion sun l renuvamënt dl cuntrat cumpartimentel per l personal dla scolina. Dla delegazion publica fejel pert, dlongia l diretëur generel Hanspeter Staffler, che ie cumpetënt per la cuntratazion culetiva, Albrecht Matzneller dla Repartizion Personal, Karin Egarter dl ufize Personal dla scoles y dla scolines y la ispetëures per la scolines Manuela Pierotti, Christa Messner y Edith Ploner.
"La Jonta provinziela se ova bele dl 2016 mpenià cun la sotscrizion dl protocol de cunsëns cun i sindacac de nvië via mo nchin la fin de chësc ann de scola la tratatives per l cuntrat cumpartimentel. Śën cuncretisons chësc mpëni” sotrissea l'assessëura Deeg. Dal autonn passà vëniel regulermënter fat ancuntedes cun la urganisazions sindacheles, pra chëles che l vën njinià la tratatives cuntratueles. L assessëur Philipp Achammer dij che "cun la numinazion dla delegazion pudons se cunfrunté sun i modiei de lëur nueves per arjonjer n alesiramënt dla cëria che pëisa sun la truepa culaburadëures dla scolina. L ie positif che śën, do che n à rujenà suvënz cun i sindacac, possen, de gra ala deliberazion da ncuei, pië via debota cun la tratatives." L assessëur per la Scola ladina Florian Mussner sotrissea che a chësta maniera y tres l dialogh possen tosc ruvé, a una, a na soluzion, dantaldut ajache la scolines ie istituzions de furmazion de gran mpurtanza y la maestres dla scolina toca da unì sustenides te si lëur prijà.
La Jonta provinziela à oradechël nce apurvà l cuncors de uega per l ann de scola 2017/2018 ti profii prufesciunei "culaburadëur pedagogich/culaburadëura pedagogica" y "nseniant/nsenianta de scolina". I candidac y la candidates muessa garantì 3 mënsc de servisc efetif danter l prim de setëmber y i 31 de dezëmber 2017, unfat ciun che sibe l amudlé dla ëures dl raport de lëur. Per nfurmazions: Servisc personal dla scolines y per la ntegrazion, streda Renon 13, Bulsan. Tel. 0471 - 412140/41.
USP
