Presentaziun dla reorganisaziun dla Repartiziun Sanité
Tl contest dla reorganisaziun di sorvisc sanitars él gnü tut la dezijiun da reorganisé ince la Repartiziun Sanité.
L’assessuria por la sanité Martha Stocker á presenté incö danmisdé ai 19 de ma ai zirca 100 colaboradus dla Repartiziun Sanité i resultac de n’analisa interna de n valgönes incuntades che reverda la reforma dla sanité provinziala.
“La realisaziun dla reforma sanitara ne portará nia ma para mudamënc por ci che reverda l’Aziënda sanitara mo al gnará ince a se le dé na spartiziun nöia di compic, dles competënzes y dles responsabilités tla Repartiziun Sanité”, á sotligné l’assessuria Martha Stocker tratan l’incuntada da incö. La strotöra atuala dla Repartiziun ê gnüda definida da n ordinamënt di ofizi provinziai tl ann 1996, canche al ê ciamó cater aziëndes sanitares provinziales.
L’ordinamënt nü dla Repartiziun prevëiga le passaje da 6 ofizi y 2 unités de coordinamënt a indöt 5 ofizi cun l’inserimënt dl Ofize Prevenziun y promoziun dla sanité che fej pert atualmënter dl Ofize Sport. La realisaziun concreta dla reforma cun i spostamënc dl personal y di sorvisc gnará a se le dé plüssigü tratan l’isté. Denant mëss ciamó les mudaziuns passé tla Junta provinziala por gní aprovades.
Preodü él ince da scrí fora la bandida de curida dles döes direziuns dl Ofize Guern sanitar y dl Ofize Prevenziun y promoziun dla sanité. I obietifs dla reorganisaziun é chi da eliminé competënzes doples y da reorganisé i compic de planificaziun y de control dla Repartiziun tl confrunt dl’Aziënda sanitara. Aladô dl’assessuria Stocker sará la reorgansaziun ince n’oportunité por i colaboradus, dantadöt deache ai podará adoré les esperiënzes y conescënzes tla realisaziun dla reforma.
USP
